Mat Jingeh Ki Paidbah Bym Don Doctor Ha Mawhati PHC | 15 Sngi Ai Por Ka HNYM Ïaka Sorkar Ban Thung Doctor

Nongpoh, Naitung 28: Ka jingbym don Doctor MBBS ha Mawhati Primary Health Centre, kaba la neh mynta la kumba san bnai, ka la wanrah ïa ka jingeh kaba jur ha ka rukom ai jingshakri paidbah, kaba la ktah ïa ki nongshong shnong na ki 42 tylli ki shnong kiba shaniah ha kane ka PHC na ka bynta ka jingsumar hakaba bun ki nongpang ki hap ban leit wad jingsumar sha ki hospital bad ki jaka sumar kiba jngai.

Halor kane ka jingeh, mynta ka sngi ka Hynniewtrep National Youth Movement (HNYM) Mawhati Zone ryngkat bad ka HNYM Ri Bhoi District, ka la leit ban jurip ïa ka jingtreikam jong ka Mawhati PHC bad ïakynduh ruh bad ki nongtrei kiba peit ïa katei ka jaka sumar.

Haba kren sha ki lad pathai khubor, u President ka HNYM Ri Bhoi District, u Samla Donald Muktieh, bad u President ka HNYM Mawhati Zone, Bah T. Mukhim, ki la ong ba ka jingjurip ka long hadien ba ka seng ka la ioh bun ki jingujor na ki paidbah halor ka jingbym don Doctor MBBS ha katei ka PHC.

Ki la ïathuh ba naduh u bnai ba Ar jong une u snem ym shym la don Doctor MBBS lane Doctor In-charge ban peit ïa ka Mawhati PHC. Watla ki Rangbah Shnong bad ki sengbhalang ki la dep phah bun tylli ki jingthoh sha ki bor ba dei peit, hynrei haduh mynta ym pat shym la don kano kano ka sienjam kaba shai ban pynbeit ïa kane ka jingeh.

Sa pule ruh: Kyntait ka Mei-ieid ba kam shym la lehbein ia ki khunswet, kiba kynnoh lamler kin kit la ka pap

Ha ka jingjurip, ka seng ka la lap ruh ba baroh ki kamra thiah pang ki long kiba thylli, khlem ki nongpang kiba wan shah sumar. Katkum ka jingïohi jong ka seng, kane ka pynpaw ba bun ki paidbah ki la duh jingshaniah ïa ka PHC namar ka jingbym don doctor.

Ka HNYM ka la pynpaw ruh ïa ka jingsngewkhia bad ka jingbitar ïa u MLA ka thaiñ bad ïa ka Sorkar Jylla, da kaba ong ba haduh mynta kim pat shim ïa ka sienjam ban pynurlong ïa ka jingdonkam jong ki paidbah khamtam ha kaba iadei bad ka koit ka khiah, wat hapdeng ka jingud jingnam kaba la slem.

Shuh shuh, ki nongïalam ka seng ki la ïathuh ba don ki paidbah kiba la kyntu ban khang tala syndon ïa ka PHC namar ka jingbym lah ban ai ïa ka jingshakri kaba pura. Hynrei, ka HNYM ka la rai ban ai por ïa ka Sorkar ba hapoh 15 sngi ka dei ban thung noh da u Doctor MBBS ha Mawhati PHC.

Ka seng ka la maham ruh ba lada ym don kano kano ka jingpyntreikam hapoh katei ka por, kan sa shim da kiwei pat ki sienjam jingïakhih, kynthup ïa ka jingleit tur sha Secretariat ryngkat bad ki nongshong shnong ka Mawhati ban dawa ïaka hok.

Sa peit ruh