Khliehriat, Naitung 30: Ka seng Jaiñtia Coal Owners, Miners, Supply & Workers Association (JCOMSWA) ha ka 29 tarik u Naitung 2026 ka la phah da ka shithi kyrpang sha u District Magistrate ka East Jaintia Hills District, kaba dei ka jingpan born a ka bynta ban pynlong ia ka jingiakhih kaba jai jai kaba dei ruh katkum ka article 19 ka riti synshar ka ri.
Kane ka jingthmu ban pynlong ia ka jingiakhih kaba jai la pynbeit ba kan long ha ka 4 tarik u Nailar 2026, ka ban sdang na Lad Rymbai bad pynkut ha phyllaw ka ophis u DC ha Khliehriat. Kane ka kynhun ka khmih lynti palat 400 ngut ki paidbah kin sa wan ban shim bynta ha kane ka jingiakhih kaba jai jai.
Pule ruh:Pyniasuk ka Shnong Lumnongrim Dewlieh iaka Kong Christabell, ki khunswet bad ka Kong Worda
U Information Secretary ka JCOMSWA u Bah Overcome Dkhar u la ong ba ka seng kam shym la shong kli kti halor ka jingkhang tih dewiong ha East Jaintia Hills bad ki la dang wad ki lad ki lynti ban iakhun ia ka hok ki paidbah kumba ki paidbah ki la ai ka jingshaniah ia ka seng.
U president ka JCOMSWA u Bah Marshall S.B Biam uba la shah thngan halor ka jingdawa ban ailad tih dewiong ha East Jaintia Hills, u la kyrpad ia ki paidbah ka District bad ka jylla hi baroh kawei ban wan ai ka jingkyrshan ia kane ka jingiakhih ba jai jai bad ka jingiakhih ban dawa na ka sorkar ba ka dei ban shim khia kham kloi ban ailad noh ia ka kam tih dewiong ym tang ha Jaintia Hills bad ha ka jylla hi baroh kawei.
Peit ruh:
Shuh shuh, u la kyntu ruh ia ka sorkar ba ka dei ban pyntreikam noh ia ka Skhim Meghalaya Environment Protection and Restoration Fund (MEPRF) na ka bynta ban iarap kito kiba shah ktah na ka jingkhang tih dewiong bad ruh ban thung dieng noh ha kito ki jaka ba la julor ka mariang na ka jingtih dewiong. Ha kawei ka bynta u la kyrpad ruh ban ai jingiarap ia katei ka skhim sha kito ki ba shah ktah kam dei ban long da ka kynhun ne ki society bad dei ruh ban iarap shimet shimet tang ia kito kiba shah ktah shisha na ka jingkhang dewiong, ha kaba kane ka la ktah ia ka kam ka jam, ka kami ka kajih bad ka ioh ka kot jong ki, u la bynrap.
