Nongpoh, Naitung 30: Tang hadienba dang shen ka Hynniewtrep National Youth Movement (HNYM) Ri Bhoi District lem bad ka HNYM Mawhati Zone ha ka jingialam u President u Bah Donad Muktieh bad u Bah T. Mukhim ki la leit jurip ia ka Mawhati PHC bad ki la kynnoh ba ym don Doctor bad ba ym shim khia u MLA, ka seng Hynniewtrep National Youth Front (HNYF) Northern Region ha ka jingialam u President u Bah Hesting Lyngdoh bad u Vice President u Bah Barna Manih mynta ka sngi ki la leit syndon ban kynduh markhmat bad u MLA ka Mawhati u Bah Charles Marngar ban wad ia ka jingshisha halor ka jingkynnoh bym don Doctor bad bym shim khia u MLA.
Kane ka jingleit kynduh ka seng HNYF Northern Region lyngba kitei ki nongialam bad ki dkhot ka dei ka jingsngewkhia kum ki nongialam halor ka jingshah ktah ki paidbah na ka jingbym don doctor ha Mawhati PHC bad kum ki nongialam seng ruh shwa ban iaid shakhmat kim kwah ban shu kynthoh bad ki kwah ban wad shwa ia ka jingshisha shwa ban jam sha khmat halor ka jingeh ki paidbah na ka jingbym don doctor ha Mawhati PHC.
Haba kren sha ki lad pathai khubor, u Bah Barna Manih kum u Vice President ka HNYF Northern Region, u la ong ba ka seng kam kwah ban shu kynthoh klumar haba shim ia kano kano kamat ba ki paidbah ki ia kynduh jingeh, hynrei shuwa ban iaid shakhmat ka seng ka wad ia ka jingtip kaba bniah khnang ba kan nym long biej ia ka seng ha kaba ka shim ia kano kano ka mat kaba ktah ia u paidbah.
U la iathuh ruh haba ia kynduh mynta ka sngi bad u Bah Charles Marngar kum u MLA ka Mawhati, ki la ioh ia ka juba ba u MLA u la dep shim khia thikna ym tang ia ka Mawhati PHC kaba ym don doctor, hynrei u MLA U la shim khia ruh wat ia ka Mawlasnai PHC kaba ym don Doctor, hynrei kaei kaba la lap da ka seng u MLA u la dep shim khia ia kane ka kam bad la don ruh ki Doctor kiba dei ban leit trei hynrei kim pat shym la leit trei haduh mynta ba kum u MLA ruh um pat tip ia ka daw.
Shuh shuh, u la bynrap ruh da kaba ong ba ka seng kam kwah ban shu kynthoh klumar bad kumba ka la ioh ia ka jubab na u MLA ba la don ki Doctor kiba u la dep ba kren sha ka sorkar ba ki hap ban leit trei noh sha kitei ki PHC bad kim pat shem la wan trei haduh mynta bad kum ka seng kan wad ia ka daw bad kan nym ailad ba ki Doctor ba kin shul eh mon katba mon ba ka seng kan dang iaid buddien halor kane ka kam ka jingbym don Doctor.
U la bynrap ruh ba ka seng ka kwah ban don ka jingiatrei lang naduh ki Doctor, u MLA bad ki paidbah ba dei ban shim khia ia ka kam iap ka kam im ki paidbah khamtam ha kaba ia dei bad ka koit ka khiah ki paidbah bad lada ka seng ka lap ba kim don kata ka jingkitkhlieh kum ka seng kam banse lada dei ban kynthoh ia u MLA, ki Doctop ne wat ia ka sorkar, u la bynrap.
Sa peit ruh
