Ha kum kane ka por ba ka jingiai bteng u lapbah ban hap ha kylleng ki jaka jong ka jylla, ki paidbah ba leit ba wan ki hap ban da husiar, ioh don kano kano ka jingtwa khyndew ne khyllem ki dieng kaba lah ban wan rah ia ka jingjia ba sngewsih.
Kumba long mynta ka sngi, ha ka surok National Highway-6 ha Ri Bhoi, ka la don ka jingtwa khyndew ha Umran Dairy, ba hap ha ka surok National Higway-6 ha Ri Bhoi bad na kane ka jingtwa khyndew ka la wan rah ka jingdheng kali ba shipor, namar ia ka bynta jong kawei ka surok la tap da ka khyndew.
Katkum ka tyllong khubor ba la ioh lum, ki bor pulit ka Ri Bhoi lyngba ka tnad Traffic, ki la shim khia ia kane ka kam ban pynlait ia ki kali kiba la dheng ha ka surok bad tang ban iaid beit ka leit ka wan ki kali paidbah, ki bor pulit ki la hap ban pyniaid tang na kawei ka surok jong kane ka suork National Highway-6 ha Ri Bhoi, ha ki bynta ba twa khyndew ha Umran Dairy.
Shuh shuh, la iathuh ruh ba ki nongtrei jong ka National Highway Authority of India (NHAI), halor kane ka jingjia, ki la shim khia ban leit pynkhuid ia katei ka khyndew ba twa ha ka surok, khnang ba kan nym long ka jingthud ia ki kali paidbah ba leit ba wan lyngba jong kane ka surok bad ka jingpynkhuid ia ka khyndew ka dang iaid shakhmat, ong ka tyllong khubor ba la ioh lum.
