Shillong, Nailar 05: U Myntri Sorkar uba dei u MLA ka them Ri-Bhoi District u Bah Sosthenes Sohtun ula kyntait ba ka Byrnihat ka dei ka shnong kaba jaboh tam daka ba ong katkum ka kaiphod thymmai ka Byrnihat kam dei shuh ka jaka ba jaboh tam ka lyer hapoh ka pyrthei.
Haba kren sha ki lad pathai khubor u Bah Sosthenes, ula ong ba ka thain Byrnihat kaba don marjan bad ka Assam kam lait naka jingdon ka lyer ba jaboh hynrei kam dei pat ka jaka ha jaboh tam ka lyer hapoh ka pyrthei.
“Kumba ka long mynta kam dei kumta, hynrei haba iadei bad ka jingjaboh ka lyer te ngim lah ban shu pynksan baka khuid namar phi lah tip ba ka Byrnihat kadei ka jaka ba don bun tylli ki karkhana kumta ka jingpynjakhlia ne ka jingbym bud ki karkhana iaki kyndon baka Meghalaya State Pollution Board (MSPCB) kala bthah, te kan don beit hi ka jingjakhlia hynrei ban ong ba kadei kaba jakhlia tam ha pyrthei te kam dei kumta” ong u Bah Sosthenes.
Pule ruh:Wer u Bah Ardent sha ka jingleit tur Secretariat, mahap pat ia kiba thmu shim kabu
U Bah Sosthenes ula iathuh ba naka liang ka Sorkar naka por shaka ka la don ki jingpynsngew ba ki karkhana kiba don ha Byrnihat kin bud beit katkum ki kyndon ka MSPCB khnang baka thain kan long kaba khuid.
Ula pyntip ba dangshen ka Sorkar lyngba ka MSPCB kala sam iaki kor (Device) kiba lah ban tan iaki tdem kiba mih naki kali ne karkhana hynrei ula ban jur ba ki karkhana kidei ban iai bud ryntih iaki kyndon ka MSPCB khnang ban pynthikna ba ka Byrnihat kan nym shah pynjakhlia.
“Naka liang ka Company kala pyrshang ban buh iaki Machine bad kila ioh ruh iaka Data Report ha kaba naka liang ki scientist bad engineer kila batai ba ka machine ka pyni ba ka lah ban tan 40-50 percent iaki tdem jaboh” ula ong.
Peit ruh:
“Hynrei dei ban sngewthuh ruh ba watla ngin pyrshang ia kane ka Project hynrei ki karkhana kiba don hapoh Byrnihat kim dei ban iaid lait iaki kyndon bala buh daka MSPCB bad kino kino kiba iaid lait ne pynkhien iaki kyndon kin shah pyngat katkum ki kyndon ain” u la bynrap.
