Shillong, Nailar 05: “Ka la iaid sha ka 5 ne 6 bnai ba nga la sdang ban ialap election kum u kyrtong ka NPP ha kane ka MP election shiteng samoi na Shillong Parliamentary Constituency” ong u Dr. DRL Nonglait haba kren sha ki lad pathai khubor mynta ka sngi ha Nongbah Shillong.
U Dr. DRL Nonglait u la kren ruh halor ka kam kaba u la bteng ka jingialap election, ka dei hadien ba mynta ka sngi ka Executive Council ka North Eastern Hills University (NEHU) ka la ai ka jingmynjur ban ai bor ne ai NOC ia u Dr.DRL Nonglait ba un iakhun ha kane ka MP election shiteng samoi.
“Ka NEHU ka la ai bor ianga ban iakhun election bad mynta ngan ap sa ia ka por ba kan pynlait ia ka NOC kum ka jingaibor ban iakhun ia kane ka MP election Shiteng samoi” ong u Dr. Nonglait.
U la iathuh ruh ha kane ka jingiaid lynti ban ialap election u la ioh mynsiem bha namar ba ki paidbah katba dang mih ki sngi ki dang ai ka jingkyrshan bad u don ruh ka jingkyrmen kaba skhem ba un poi sha ka thong jong ka jingjop lyngba ka jingkyrshan bad radbah ki paidbah ka rilum Khasi-Jaintia.
Haba kylli la u don neem ka jingeh ba u hap ban iakhun ia kiwei ki kyrtong na kiwei ki party ha kane ka MP election shiteng samoi, u Dr. DRL Nonglait u la ong kino kino kiba kwah iakhun election ki don ia ka hok ban ia khun bad haba iakhun ngim dei ban khein sting bad nga don ruh ka jingkyrmen kaba skhem ban poi beit sha ka tjong ka jingjop, u la ong.
Peit ruh:
