Wat Ju Kynnoh Ba Ki Kynthei Ki Kdup Bar Jylla Dei Ki Rangbah Shnong Kiba Kdup Bar Jylla: Christabell Wanniang

Nongpoh, Nailar 06: “Dei ki Rangbah Shnong kiba ju kdup ia ki bar jylla bad ha kaba khatduh ki kynnoh pynban ia ki riew kynthei ba ki ju kdup ia ki bar jylla” ong ka Kong Christabell Wanniang, Secretary ka CSWO sengkmei haba leit ban jurip ia kawei na ka Karkhana Shna Kali ha Lumnongrim Dewlieh ha Ri Bhoi District.

Kong Christabell Wanniang kum ka Secretary ka CSWO ka la pynpaw ia kane ka jingsngewkhia ba bun ki ju kynnoh beit ia ki kynthei ba ki kdup bar jylla, ka dei hadien ba mynta ka sngi ka la leit ban jurip ia kawei na ka karkhana shna kali ha Lumnongrim Dewlieh ba ka la lap ba ha katei ka Karkhana kiba bun ki nongtrei ki dei ki bar jylla.

Ka la pynpaw ruh ba ha kane ka jingleit jurip ka seng ka la lap ba bun ki bar jylla bad kam pat kwah ban leh ei ei bad na ka liang ka seng kan sa tih bniah halor kane ka jingbun ki nongtrei bar jylla.

Haba kren sha ki lad pathai khubor, ka kong Christabell Wanniang ka la ther tyngeh ba wat ju kynnoh ia ki kynthei  ba ki dei kiba kdup ia ki bar jylla ha ki jain kyrshah, hynrei dei ki Rangbah Shnong ne ki nongialam shnong kiba ju kdup ia ki bar jylla haba ki wan trei bylla ha kino kino kino ki shnong.

Sa pule ruh: Ther U Bah Ardent Ia Kam Leh Donbor Ka Sorkar MDA Kynthup Ka Public Hearing Ka Shree Cement

Ka la ong ruh ha kane juk kaba mynta la jan bun ki kam lah ban trei da ki trai jylla, hynrei kaba sngewsih pat ba dang bun ki bar jylla bad haba ki wan bylla khlem pep don ki riew kynthei ki poi noh sha ka shongkha shnongman bad hadien kata pat ki kynnoh pynban ia ka kynthei ba ka kdup ia ki bar jylla.

“lada ym dei hi ki rangbah snong kiba ailad ban wan bylla ia ki bar jylla ki kynthei kin nym poi kha bad u bar jyllla” ong ka kong Wanniang bad byrnap ruh haba la buh lang ka dud bad ka miaw khlem pep ka miaw kan dih beit ia ka dud” ka la byntap.

Namarkata, ka la ong ba ka seng kan sa peitngor nangne shakhmat ia kino kino ki karkhana ne kiwei kiwei ki jaka ba dang ailad ban wan trei bylla ki bar jylla, namar kum ka seng kam kwah ba ka jingkynnoh ka leit sha ki kynthei katba haba wan ki bar jylla pat dei ki nongialam shnong kiba kdup bad kiba ailad ha kaba lada kim ailad kumno kin ioh lad ban wan bylla, ka la bynrap.

Sa peit ruh