Mawkyrwat, Nailar 07: Ka Dorbar ba la khot da u Syiem Nangtei Syiemiong ia ki khlieh shynrang kiba la 18 snem shaneng ban pynshai iaka Management Board bad ban pynshai ia ki rukom treikam u Syiem hadien ba ula shimti kum u Syiem ka Hima Langrin Syiemship mynta ka sngi ka la poi pynban sha ka jingklumar bad ka huri hura hapdeng ki ar kynhun kiba kyrshan bad kiba pyrshah ha kane ka dorbar.
Kane ka jingklumar ka la mih ruh hadien ba la kut ka dorbar ba ki kynhun kiba pyrshah kim hun satia ia kane ka Dorbar, namar ba na ka liang u Syiem um ailad ban kren ia ki khun ki hajar bad la shu ailad ban kren tang ia ki Lyngdoh bad ia u kum u Syiem.
Halor kane ka jingklumar, na ka liang u SP ka South West Khasi Hills ruh u la pynlait ia ka kyrwoh sha ki lad pathai khubor ba la kynnoh ba kane ka huri hura ka mih hadien ba la iaid katei ka dorbar ba ki don ar kynhun kata kumba 1500 ngut ki kynhun ba kyrshan ia u Syiem bad kawei pat ka kynhun kaba don kumba 1500 ki pyrshah bad kim ailad ia u syiem ban wan shim bynta ha katei ka dorbar haduh ba la mih ki jingklumar.
Pule ruh:Ther U Bah Ardent Ia Kam Leh Donbor Ka Sorkar MDA Kynthup Ka Public Hearing Ka Shree Cement
La ong ruh shwa ban kut kane ka Dorbar la don na ka liang ka kynhun ba pyrshah ki la wan ban thaw ki jingklumar haduh ba la mih ka huri hura bad ki bor pulit ki la ialeh ban tem ia kane ka jingiakajia haduh ba la pait ki shuki bad la don ruh kumba 8 ngut ki pulit ki la mynsaw bad uwei u la mynsaw jur na ka pynibor kito kiba pyrshah.
Peit ruh:
La ong ruh naduh ki Magistrate bad ki bor pulit ki la pyrshang ban pynthanda bad ban pynjem ia kane ka jingiahuri hura, hynrei kito kiba pyrshah ki la thom da ka bor bad la don ruh kiba kawang maw haduh ba la hap ban pyndonkam bun ki bor pulit ban tem ia kane ka jingjia.
Na ka liang ki bor pulit ki dang ap ia ka ejehar ban ujor da ka Hima Langrin halor akne ka jingjia khnang ba kin lah leh katkum ki lynti jong ka ain.
