Kiba bun ki paidbah ha ka jylla, ki hap ban husiar na ka jingsaphriang tuh ki pisa thok, ba la leh ia kane ka kam da ki riew shim kabu bad bun ruh ki paidbah ki la mad ia kane ka jingeh, ha kaba ka daw ka long ba kim lah ban pyniapher hapdeng ka dur ka dar jong ka pisa ba shisha bad ka pisa thok.
Kumba la ioh lum jingtip, dang ha kine ki sngi ba la leit noh, ki la don ki nongshong dukan kiba shah thok, ha kaba ki riew shim kabu ki shim kabu ban ai da ka pisa thok bad ha ka jingbym poi pyrkhat kin sa tip hadien bad kim lah pat ban tip mano ba wan thieg jingthied na ka dukan jongki.
Lah ruh ban ong, ba bun ruh ki nongshong dukan bad wat ki riew paidbah ruh ki la ud halor kane ka jingeh, kaba dei na ka jingsaphriang ki pisa thok bad teng teng ki ngat ha kane ka apot bad lada ki ioh da ka pisa thok ka long ka jingduhnong ia ki, na ka daw ba kim tip ia ka pisa thok bad ka pisa ba shisha.
Ki bor pyniaid jong ki bank bapher bapher ha ka jylla, ki la dei ruh ban shim khia ha kane ka bynta ka jingpynsaphriang ia ka pisa thok bad lada ki lap ne ioh ha ki Bank, ki la dei ban shon muhor ban pynthikna ba ka dei ka pisa thok (Fake notes) bad kaba long ruh ka jingiada na ka jingpynsaphrinag ia ki pisa thok.
Namar kata, kum ki bor sorkar bad wat ki bor ba halor ba dei peit ia ki Bank, ki la dei ban shim khia halor kane ka bynta ban ai jinghikai sha ki paidbah, khnang ba kum ki paidbah kin dup tip ia ka pisa ba shisha ne ka pisa thok bad ia kino kino kiba don kti ha kum kane ka kam ban pynsaphriang ia ka pisa thok dei ban ai da ka jingpynshitom kaba tyngeh.
