Nongpoh, Nailar 12: Ka Ri Bhoi District Sports Association, lane ka RBDSA, mynta ka sngi ka la plie paidbah ïa ka lympung ïalehkai Football kaba la ai kyrteng Dr. D.D. Lapang Football Tournament 2026 bad ia katei ka lympung la pynlong ha Umbuda Artificial Turf, ka madan ka ba dang shu dep plie dang shen.
Ïa kane ka lympung ialehkai la pynlong kum ka jingkynmaw bad ka jingpynsahnam ïa u Dr. D.D. Lapang, “bam kwai ha dwar u Blei”, u nongïalam ba ratbah bad uba la long ruh kum u Myntri Rangbah barim ka Jylla Meghalaya, uba la noh synñiang shibun ha ka jingshakri ïa ki paidbah ka Dong bad ka Thaiñ Ribhoi bad ïa ka jylla baroh kawei.
Ia kane ka tournament la wan ban plie da u bah Mayralborn Syiem, MLA ka Nongpoh kum u Kongsan haka jingiadonlang u Dr. Abhishek Saini, Deputy Commissioner ka Ri Bhoi District, u Bah P.S. Nongrum, Acting President ka RBDSA, u Bah Dipshon Ryntathiang, Secretary ka RBDSA, u Bobby L. Nongbet, District Sports Officer, ryngkat ruh bad ki bad ki bahaïing hasem jong u Maheh Dr. D.D. Lapang.
Hadien ka jingïalang plie, ka lympung ka la sdang da ka jingïalehkai kaba nyngkong hapdeng ka Sohnidan SC pyrshah ïaka Umsaitsning SC, kaba la pynsngewtynnad iaki nongpeitkai ha ka madan.
Haba kren ha ka jingïalang, u MLA bah Mayralborn Syiem u la pyn kynmaw ïa ki katto katne ki kam kiba ratbah kiba u Maheh Dr. DD Lapang u la leh naka bynta ka them Ribhoi bad u la ai ruh ïaka jingïaroh ïa ka jingnoh synñiang jong u Maheh Lapang ha ka jingshakri ïa ki paidbah ka Meghalaya.
Peit ruh:
Ka Dr. D.D. Lapang Football Tournament 2026 ka long kum ka dak jong ka jingïai burom ïa ka kyrteng jong utei u nongïalam, ha kajuh ka por ban ai lad ïa ki samla ïalehkai phutbol na Ri Bhoi ban pyni ïa ka sap bad ka bor jong ki ha ka kam ïalehkai.
Da kane ka lympung, ka RBDSA ka thmu ruh ban pynkhlaiñ ïa ka jingïalehkai phutbol bad ban kyntiew ïa ki sap jong ki khun samla ha ka district.
