Shah ktah ki Kali Pickup bad ki Dribar ha Ri Bhoi ba ioh rung laitlan ki Kali kit jingri ki bar jylla

Nongpoh, Nailar 12: Ka jingwan rung laitlan ki kali kit Jingri na shabar ban rung shapoh Jylla khlem da don shuh kano kano ka jingpyrkhing ka la wanrah pynban ka jingeh iaki trai bad ki Nongñiah kali Pickup jong ka Dong bad ka Thaiñ Ri Bhoi ki kiba ju bylla ban kit iaki jingri ban pynpoi sha kylleng ki jaka.

Ban tehlakam ïa katei ka jingeh, naka liang ka kynhun Ribhoi Commercial Pickup Owner & Driver Association hynnien ka sngi ka la lum iaka jingialang ha Umsning ban ia thir halor ki jingeh kiba kum ki Trai bad ki Nongñiah Kali Pickup ki hap ban mat ha kine ki sngi.

Hadien katei ka jingialang, Naka liang u President jong katei ka kynhun u Samla Standwell Manih u la wan shakhmat ban kren sha ki lad pathai khubor ban iathuh ba kum ki trai bad ki Nongñiah Kali Pickup ki mat shibun ki jingeh naduh ba kam shym la don shuh ka jingpyrkhing iaki Kali kiba wan nabar bad kane ka pynioh kabu iaki bar jylla ban kit hi iaki jingri ban pynpoi sha kylleng ki jaka.

Pule ruh: Dei ka NPP kaba la ialam ia ki nongialam niam ban kynduh ia u Myntri ka sorkar pdeng halor ka FCRA: Conrad

U Bah Standwell Manih u la iathuh ruh, ka jingsangeh ki Pulit ban pyrkhing iaki Kali kit Jingri kiba wan nabar ka jylla ka dei naduh ba mih ka kynhun ki nongrep ka Hills Farmers Union ban tuklar ia katei ka kam kaba la mih ruh ka jinghuri hura kaba la pynlong iaki Pulit ban sangeh ka jingpyrkhing bad talasi ia kitei ki kali.

U la Pynpaw ruh ba lyngba ka jingioh laitlan ki kali nakadaw ka jingbym don shuh ka jingpyrkhing ka ktah pat iaka kamai ka jih jong ki trai jylla namar ba kim ioh shuh ban kit iaki jingri ban pynpoi sha ki jaka namar ba la wan rung hi daki kali kiba nabar ka jylla.

U Standwell u la iathuh ruh ba naka liang ka kynhun ka la dep ban leit ud ia kane ka jingeh sha ki bor ba halor bad lada kam don shuh ka jingpyrkhing, naka liang ka Association kan leit hiar hi sha Byrnihat ban pyrkhing iaki bar jylla kiba thmu ban kit iaki jingri khlem pynbiang iaki kot ki sla.

Peit ruh:

Kum ka Association ka kyntu ruh ia kino kino ki riew Shimet lane ki Dalal kiba ju pynlait iaki Kali ba kim dei ban pynlait iaki Kali kiba khlem kot khlem sla namar lada ioh laitlan ki kali kiba nabar ka Pynduh pat iaka kamai ka jih jong ki trai jylla bad kan wanrah pat iaka jingeh namar ba kum ki trai Kali ki hap shim daka ram ban thied iaki Kali.