Nongpoh, Nailar 21: Ki nongialam ka Assam State Taxi Driver Union ym tang ba ki la khang lut ia ki Kali Assam bad Meghalaya ba leit ba wan lyngba ka surokbah ha Jorabat kaba dei ka jingpyrshah halor ka jingshah kawang maw ki Kali na Assam kaba mih na ka jingiaid bike rally ka KSU, hynrei ki la byrngem ruh ban khang beit ia ka surok baroh arliang kiba rung sha Meghalaya bad Assam katba ki bor sorkar ka Meghalaya kim wan ia kren ne ia pynbeit ia kane ka kynrum ka kynram ha katei ka jaka iakhih jong ki ha Jorabat.
Kumba la sakhi mynta ka sngi, ki nongialam bad ki dkhot ka Assam State Taxi Driver Union ym tang ba ki shong syndon ha ka surokbah ban ia khih, hynrei ki la khang syndon sbak ia ka surok khlem da ailad shuh ban leit la ki dei ki Kali na Assam ne Meghalaya.
Ka jingkhang jongki ka dei naduh ki Kali ki riew shimet, ki kali ba kit marbam bad ki kali ba kit ia ki tiar ba donkam kata kynthup ki Kali ba wan na Meghalay bad na Assam.
Haba kren sha ki lad pathai khubor, ki la kynnoh ba kane ka jingjia kam dei shuh ka sian kaba nyngkong ba ki briew na Assam ki shah thombor ha Shillong, hynrei na ka por sha ka por bad ki la pynrem ruh ia ka KSU haba ka iakhih bad ka sorkar kumno ki thombor pat sha ki riew paidbah ha kaba ha ka jingshisha ki dei ban iakhun pyrshah ia ka sorkar bad ym ia ki paidbah.
Pule ruh: Dang step wan Lute ki suba Khar Bangladesh na kawei ka ïing ha ka shnong Dona Bhoi ha EJHD
Ki la pynrem jur ruh ia ka sorkar Meghalaya bad kynthup ia ka tnad Pulit ka Meghalaya ba kam shym la leh ei ei halor katei ka jingjia ba shah thombor ki briew na Assam bad ki la kynnoh ruh ba kane ka jingshah thombor ka dei kaba ym lah ban pdiang, namar ki briew na Meghalaya kim ju shah thombor haba ki wan sha Assam bad balei shah thombor tang ki briew na Assam haba ki leit sha Meghalaya.
Peit ruh: ‘
Shuh shuh, ka khubor kaba shai kaba ki la phah sha ka sorkar Meghalaya ba da lei lei kin nym sangeh ia kane ka jingiakhih katba ym pat wan da ki heh sorkar ka Meghalaya bahn ia kren ne ia pynbeit, namar kim hun satia ba u Conrad Sangma un shu pynpaw tang ha ki Social Media ba la dep ia kren iasuk bad ka sorkar Assam bad lada ki kwah ban kut noh kane ka jingniakhih ki dei ban wan beit ha Jorobat ha kaba lada u myntri rangbah um lah ban wan ruh dei ban phah da ki heh sorkar ne wat lada dei ban wan da u Chief Secretary ban ia kren ha Jorabat.
