Shillong, Nailar 26: Ha ka jingkhot ia kren ka sorkar jylla ia ka Khasi Students Union (KSU) ban ia tai halor ki 5 tylli ki mat jingdawa ka seng, u president barim ka KSU u Samla Lambok Star Marngar u la ong ba ha kane ka jingiakren wat la ym lah ban pynurlong 100 percent, hynrei kumba 70 percent ki jingdawa ka seng ka la urlong bad ka la jop hadien ba ka sorkar ka pynthikna ia kitei ki mad jingdawa ka seng.
Kum ban pynkynmaw, ha jingialang ba la khot ia kren da ka sorkar mynta ka sngi ia ka seng KSU ha Nongbah Shillong la shim bynta naduh u Myntri rangbah ka jylla, u Conrad K. Sangma, ki Symbut Myntri ka sorkar u Bah Prestone Tynsong, ki heh ophisar ka sorkar bad na ka liang ka KSU la don lang naduh President barim ka KSU u Samla Lambokstarwell Marngar, u Samla Donald V Thabah, ki nongialam ka CEC bad kiwei kiwei ki nongialam ka KSU Sengkmie.
Haba kren sha ki lad pathai khubor, u Samla Lambokstar Mangar kum u President barim ka KSU u la ong ba ha kane ka jingiakren ka seng kam ong ba baroh ki jingdawa ki la urlong, hynrei na ka 100 percent la kumno kumno kumba 70 percent ki la urlong bad ki la jop.
U la ong ruh ha ka jingshisha ha ka dorkhas kaba nyngkong ka KSU ka la buh haduh 20 tyllli ki mad jingdawa, hynrei mynta ka seng ka la buh Shwa tang kitei ki 5 tylli ki mad jingdawa ha kaba ka sorkar ka la khot ia kren mynta ka sngi.
“Ngam lah ban ong kaei ka rai ba ka KSU kan shim nangne shakhmat, hynrei ia mynta kumba ka sorkar ka la kular ha kane ka jingiakren, ka seng kan sngap shwa bad lada ki kine ki jingkular kim sei soh ka seng ruh ka hap ban shim da kawei pat ka rai ne ka lynti” ong u Samla Lambok Star Marngar.
Kumba la pynpaw ruh da une u nongialam ba ka seng ka la dawa ba dei ban pynduh pyndam syndon ia ka Public Hearing ka Shree Cement, ka sorkar ka la rai ban thung da ka Fact Finding Committee bad kynthup ruh ba ka seng ka la dawa ban sospon kam ia u DC bad SP ka East Jaintia Hills bad ia mynta ka seng kan ap shuwa iaka kaiphod jong katei ka Committee kumba la kular da ka sorkar.
U la ong nalor kiwei kiwei ki mat ba lada wa ka seng, ka sorkar ka la rai ruh ban pynterikam noh mardor ia ka MRSSA 2016 bad khamtam ban buh ia ki khyrdop talasi mynder ha kaba lada ym lah ban pynurlong ia ki 18 tylli ki khyrdop, la kumno kumno dei ban sdang shwa na Umling kaba la don lypa.
Peit ruh:
U la iathuh ruh ba ka sorkar ka la kular ruh ban shim khia ban pynteikam ia ka ain ban tehlakam ia ki nongwan bylla ba la tip kum ka Meghalaya identification registration safety and security of migrants workers Act bad kynthup ruh ia ka mat kiba ka seng la shim ha NEIGHRIMS ba ka sorkar kan kren syndon sha u mytnri ka tnad ka koit ka khiah ka sorkar India ban ioh ia kren bad ruh halor ki jingthungkam la ka dei ha MPSC ne DSC ka dei ban long kaba khuid kaba suba.
