Buh jingkylli u Bah Ardent haka Dorbar  ban pynshai halor ka dor ka mur ki dawai sboh ki Nongrep

Shillong, Nailar 27: Ha ki kynta ba la ai lad ban kylli jingkylli hapoh ka Dorbar Synrai kaba la poi sha ka sngi kaba saw mynta ka sngi, u MLA ka Nongkrem u Bah Ardent Miller Basa wmoit kum  nongmihkhmat paidbah na ka VPP party u la wan rah ia ka mat bab kylli jingkylli bad ruh ban pan jingshai na u Myntri ba dei peit ia ka tnat jong ka kam rep kam riang halor ka jingshah ktah bad shah khnioit dor ki nongrep haba ki leit thied ia ki sboh na ka bynta ka kam rep ka kam riang.

Na ka liang u Bah Ardent Miller Basaiawmoit kum u MLA, u la rah ia kane ka mat hapoh ka ïing dorbar ka jylla, kadei namar ba u la ioh ka jingujor na ki nongrep ba ki don ki riew shim kabu kiba die ia ka sboh palat ia ka dor ba la buh da ka sorkar.

Kine ki jingkylli u Bah Ardent ka long ban pynshai halor ka dor jong ki sboh kum ka Urea, DAP bad kiwei kiwei ki sboh ba pyndonkam ki nongrep, kata ban pan jingshai halor ka dor ba la buh da ka sorkar bad ruh ki subsidy, ha kaba la kynnoh ba don kiba la die palat ban ia ka dor ba la buh da ka sorkar.

Halor kane ka jingkylli u Bah Ardent Miller Basaiawmoit, u Myntri ka tnad ka kam rep u Timothy D Shira u la ai ka jubab halor kitei ki jingkylli ba kito kiba die ia kitei ki sboh naduh ka Urea, SSP bad Dap kim dei ban die palat ban ia ka dor bad la buh da ka sorkar bad lada lap kin shah pynshitom katkum ki  kyndon jong ka ain.

Pule ruh: Seisoh ka jingiakren ka KSU bad ka sorkar| wat la 100% kam urlong, hynrei 70% ki jingdawa ki la urlong: Marngar

U myntri ka tnad rep u la iathuh ruh ba na ka por sha ka por la ju phah ban leit jurip ha kito ki dukan ba die ia ki sboh bad u la ong ruh ki hap ban bud ia ki kyndon ba dei ban pynpaw paidbah ruh ia ka dor jong ki sboh kumba la buh da ka sorkar.

Halor kane ka jingpan jingshai halor ka jingshim kabu ban die  ia ki sboh dawai ban rep ban riang, la iarap ruh ban jubab da u Myntri rangbah ka jylla ba kito kiba leh tam ne die palat ban ia ka dor ba la buh da ka sorkar, ka sorkar kan pynduh syndon ia ka License la ki dei ki retailer, supplier ne wholesellers, ha kaba u Bah Ardent u wan rah ia kane ka mat ka long ba bun ki nongrep ki shah ktah jur na ka jingshim kabu ban die tam ia ka sboh dawai palat ia ka dor ba la buh da ka sorkar.

Peit ruh: