Ka long shisha ka jingkmen kaba khraw ia kawei ka kynhun tem ba la tip kum ka ‘Eastern Brook Band’, kaba dei ka kynhun nongtem jong kito ki samla ba don ka jingduna ha ka bor iohi, namar na ka liang u Conrad K. Sangma kum u Myntri rangbah ka jylla, u la lah ban pynurlong ia ka jingangnud jong katei ka kynhun tem, da kaba u la lah ban sam mynta ka sngi ia ki tiar put tiar tem (Musical Instrument) kaba long ka jingangnud kaba la slem bah jongki.
Haba kren halor kane ka kynhun nongtem ba don sap kyrpang ha ka put ka tem, ba la tip kum ka ‘Eastern Brook Band’, kane ka kynhun ka don 4 ngut ki dkhot, kiba la ju don bynta ha ka put ka tem ban pynshohbiej ia ki paidbah ka jylla lyngba ki sap kyrpang jongki, kaba dei ruh wat lada ki don hapdeng ki jingduna jong ka bor khmat ban iohi.
Kane ka kynhun tem ka la lah ban pynurlong ia kane ka jingangnud, ka dei na ka jingshim khia u Myntri rangbah ka jylla, uba la pynpaw ia ka jingkmen bad shoh biej ruh lyngba ki sap ki phong kyrpang jongki bad ruh ka jingieit kyrpang jongki ha ka liang ka put ka tem wad la ki don ka jingduna ha ka liang ka bor khmat ban iohi.
Ia kitei ki tiar tem tiar put la pynkhamti mynta ka sngi sha ki dkhot katei ka kynhun tem ha ka jingialang kaba la long ha ka ïingsah u myntri rangbah ha Nongbah Shillong ba la sam da u Myntir rangbah, u Conrad K. Sangma sha ki dkhot katei ka kynhun.
U Myntri rangbah ka jylla, u Conrad K. Sangma, u la ai ruh ka jingiaroh kaba kyrpang ia kane ka kynhun tem bad u la ai mynsiem ruh ia ki ba kin dang trei shitom ban pynurlong ia ka jingangnud jongki ha ka liang ka put ka tem.
” Ka put ka tem ka don ia ka bor kaba kyrpang ban pynshohbiej bad ruh ban wan rah ia ka jingiatylli” ong u Myntri rangbah ka jylla, u Conrad K. Sangma, bad bynrap ruh kum u myntri rangbah ka jylla, u dap shisha da ka mynsiem jongka jingkmen bad ban ai ruh ka jingkyrshan kaba pura ia kane ka kynhun da ka jingangnud ba kane ka kynhun kan poi sha kata ka thong kaba ki angnud ha ka jingim wat la ki don kata ka jingduna ha ka liang ka bor khmat ban iohi” u la bynrap.
Shuh shuh, u la pynpaw ruh ba kane ka thong jong u Myntri rangbah, ka long ban pynkup bor kyrpang sha baroh ki samla ka julla bad ki riew donsap ha ka jylla ha ki bynta bapher bapher jong ka jingim bad khamtam ia kum kine kiba don jingduna ha ka liang ka dkhot met. Ka Meghalaya Grassroots Music Programme ka long ruh ka rynsan ne ka kabu ba kyrpang lyngba ki jingiarap na ka sorkar jylla na ka bynta ki samla donsap ka jylla kaba la buh thong da u Myntri rangbah ka jyla, khnang ba kin lah ban pynpaw pyrthei ia ki sap kyrpang ba la ai da u Blei.
