Namar ka jingsngewkhia kaba jur halor ka jinglong jingman jong ka surok bah National Highway 6 ha ka thain East Jaintia Hills District, khamtam ka jingsniew jong kane ka surok ka la buh jingeh shikatdei ia ki paidbah nongleit nongwan, halor kane ka jingud u paidbah, u MP ka Voice of The People Party (VPP), u Dr. Rickyn AJ Syngkon u la leit ban buh da ka darkhas bad ban dawa tuklar ha u Myntri (Union Minister) ka tnad Road Transport and Highways, u Nitin Gadkari ha nongbah New Delhi.
Ha kane ka jingleit ia kynduh ia u Gadkari, u Dr. Syngkon u la aiti da ka dorkhas bad kyrpad tyngeh na ka tnad Road Transport and Highway ban phaikhmat noh mardor ia ki jingeh ki paidbah nongleit nongwan khamtam ia kito ki kali kit marbam mardih bad kiwei kiwei tang na ka daw ka jingsniew ba la palat liam jong ka surok NH -6 ka ba dei ka surok ba kongsan tam ia ki jylla kum ka Meghalaya, Assam, Tripura, Mizoram bad kiwei kiwei.
La kdew ruh, ba ka jingiai twa jongka surok ha ka surok Sonapur Tunnel ka dei ka jingjia kaba jia man ka por khamtam ha ka por lyuir bad bunsien la hap ban khang ia ka leit ka wan ki paidbah bad kane ka ju pynthut bha ia ki paidbah khamtam ha ka pang ka shitom.
U Dr. Syngkon u la shimkhia ia kane ka jingeh u paidbah hadien ba u la jop kum u MP bad ka dei ruh ka mat kaba kongsan eh na ka bynta ki paidbah ka jylla Meghalaya bad kiwei kiwei ki jylla.
Lah ban kdew ruh, ba dang shen u MP ka party VPP u la rah ruh ia ka mat ba kongsan ha ka Iingdorbar Thawaiñ, halor ka jingdonkam ban ithuh noh ne ban pynrung noh ia ka ktien Khasi ha ka khyrnit kaba 8 jong ka riti synshar treikam ka ri India.
