Pynbam smai u Bah Sadon Blah ïaki nongïalam ka HNYF ha Ri Bhoi, sakhi lang u MLA Nongpoh

Nongpoh, Nailur 19: Ban dang pynkhlain bad ban dang bteng ïa ki jingshakri na ka bynta ki paidbah them Ri Bhoi, ka Hynniewtrep National Youth Front (HNYF) Sengkmie mynta ka sngi ha ka jingïalam u Bah Sadon K. Blah kum u president ba rangbah ka seng u la shim ïa ka bynta ban pynskhem ne pyntïan smai ia ki nongïalam ba thymmai ka HNYF Northern Region ha Ri Bhoi District.

Ki nongïalam ba thymmai ka Hynniewtrep National Youth Front (HNYF) Northern Region ki kynthup ïa u President ba la jied ïa u Bah Robinson Umbah, Prosperwell Shadap Vice President, Shiningstar Kyntla Finance Secretary, Donroy Kshiar Education Secretary, Vincent Sylliang Organizing Secretary, Banpynshai Umbah Publicity Secretary, Ïaidshaphrang Nongbri Political Secretary, Apbor Nongrum Agriculture Secretary, Ronal Tangsang Office Secretary bad u Bah Heasting Lyngdoh kum u Adviser.

Ïa kane ka jingïalang ban pynskhem ïa ki nongïalam kane ka seng la pynlong ha Auditorium Hall ka Umsning Town Durbar, ha kaba la wan ban shim bynta da u Bah Mayral Born Syiem MLA ka Nongpoh kum u kongsan bad la sakhi lang ruh da ka jingdon lang u Bah Sadon K. Blah kum u President ba rangbah ka seng.

Pule ruh: Ïoh Ring Dur Ka Kor CCTV Ïa U Runar Ba Tuh Ïa Ka Bike Yamaha Ha Malki

Kiwei kiwei kiba la ïa don lang ha kane ka sngi u Bah Barnabas Manih Vice President ka Seng Kmie, u Bah Rocky Kylla Chairman ka Umsning town Durbar, u Bah RR Kynsai Makdoh kum u riew rangbah ka Ri Bhoi, u Bah Phrangsngi Kylla nongïalam ka RBYF, u Bah Heasting Lyngdoh, President barim ka HNYF Northern Region bad kynthup ruh ki Rangbah shnong, ki riew rangbah bad ki nongïalam ka HNYF na ka sengkmie bad na Ri Bhoi District.

Haba kren ha kane ka sngi kum u kongsan u Bah Mayral Born kum u nongmihkhmat paidbah u la buh hakhmat eh ïa kine ki nongïalam kiba thymmai ba ki dei ban long kita ki nongïalam kiba tip briew tip blei bad haba ki shim ïa ka lyngkor nongïalam ki dei ruh ban shim ïa kata ka jingkitkhlieh na ka bynta kiba bun ki mat ki jura jong ka jaid bynriew.

U la ong ruh kum ki nongïalam ki dei ba kiar na kiei kiei ki kam jong kane ka pyrthei kiba long tang ka jingpyrsyrwa kai ïa ka por bad kum kita ki nongïalam ki hap hi ban don ïa kata ka mynsiem ban kit ban bah lem na ka bynta ka eh ka shon jong ki paidbah ha ka them Ri Bhoi bad ha ka jylla hi baroh kawei.

U la ong ruh bun ki seng bhalang ki la mih ban ïa khih bad buh ruh ïa kita ki mad jingdawa kiba dei hi na ka bynta ka jingdonkam jong u paidbah kaba long ruh kum ka jingkyrsiewthiah ïa ka sorkar.

Peit ruh:

Ha kane ka sngi la ai jingkren ruh da u Bah Sadon K. Blah kum u President ba rangbah ka seng uba la kren halor shibun ki mat kiba dang sahteng ha ka jylla kum ka ILP, ka MRSSA bad kiwei kiwei ba kum ki seng bhalang ki ju ïakhih na ka por sha ka por ba ka sorkar pat ka dang leh mynthi.

La ai jingkren ruh da u President ba thymmai ka HNYF Northern Region u Bah Robin Umbah ha kaba u la pynpaw ïaka jingkmen ban shim ïa kane ka lyngkor nongïalam ban ïa kit ïa bah leh ïa ka eh ka shon u paidbah, hynrei u la pynpaw pat ban trei na ka bynta ka jingïabit ïabha lang donkam ka jingïatei lang na ki liang baroh.