Jan kylla madan thmai ha Madan Maikhuli ba wan kyntur pud ka Assam, kurup ki Longkmie ïaki Nong Assam

Nongpoh, Nailur 19: Ka la don biang ka jingïakurup bad ka thma ktien kaba jur hapdeng ki longkmie na ka shnong Maikhuli, Ri Bhoi bad ki rangbah na ka jylla Assam, kata ka dei hadien ba mynta ka sngi, la don ki briew na Assam, kiba la wan ban khang tala da kaba ker bad khang tala da ki siej ïa ka lynti ban rung sha Madan shnong, nangta ïa kawei ka lynti shnong ba ïaid ki paidbah bad ruh hadien ba ki la pynpra ïa ka kynroh skul da ka Puh Shilum.

Katei ka jingjia, ka la jia mynta ka sngi ha ka por 10:30 baje eiei mynstep, ha kaba la don ki briew na ka jylla Assam, kiba la leit ban ker bad khang tala da ki siej ïa ka lynti ban rung sha Madan shnong, nangta ïa ka lynti shnong, bad pynpra ïa ka jingker ka kynroh shnong, kumta haba ki briew na ka shnong Maikhuli khamtam ki longkmie, haba ki la iohi ïa katei ka jingleh ki briew na Assam, ki la leit mar mar sha kitei ki jaka, na bynta ban ïakren, kumta haba la ïaid ka jingïakren, la poi sha ka jingïaheh nia bad ka jingïakurup mar met.

Pule ruh: Pynbam smai u Bah Sadon Blah ïaki nongïalam ka HNYF ha Ri Bhoi, sakhi lang u MLA Nongpoh

Hapdeng ka jingïania bad ïakurup hapdeng ki longkmie Maikhuli bad ki briew na Assam, la lah ban kyndang ïa kitei ki jingker da ki siej bad tala, ba la wan ker da ki briew ka Assam, da ka jingthmu ban wan kyntur pud ha katei ka shnong.

Kham hadien katei ka jingjia, ki Bor Distrik ka Ri Bhoi ki la wan poi sha katei ka jaka ban tem ia kane ka jingiakajia, kiba kynthup ïa u N Hajong, ADC Ri Bhoi, u Akash Marak, Magistrate Nongpoh, nangta ki Pulit kiba kynthup ïa u M. Marngar, Addl. SP, u P Baida OC Khanapara PS, u S Khymdei OC Pillangkata OP lem bad kiwei.

Peit ruh:

Ym tang ki Bor Distrik bad Pulit kiba la poi mar mar sha Maikhuli, hynrei na ka liang ki nongïalam ka FKJGP Raid Marwet, kaba la ïalam u Bah Denis Nongrum, President, u Bah Alan D. Sohpdang, General Secretary, u Bah Debos Chyne, na FKJGP NKHD lem bad kiwei. Nalorkata la don leit ruh ban synran da ki nongïalam ka ARMPF.

Kitei ki nongïalam Seng, haba kren sha ki nongthohkhubor, ki la ai jingïaroh ïa jingshlur ki longkmie na ka shnong Maikhuli, kiba la long kum ki shipai ban ïada ïa u pud u sam, ha kawei pat ka liang, ki la kyntu ïa ka sorkar ba ka dei ban shimkhia ïa u pud u sam ha Maikhuli bad ruh ban pynbun ïa jingdon ki bor Pulit ha katei ka thain Maikhuli.