Kyntu U MLA Nongpoh Ban Ïa Khun Ïaka Jingeh Ki Nongri Sniang Tang Da U Tylliej Bad U Khulom

Nongpoh, Nailur 21: U MLA ka Nongpoh Constituency u Bah Mayral Born Syiem mynta ka sngi kum u nongmihkhmat na Ri Bhoi District, u la kular ïa ka Hill farmers Union (HFU) ban shim khia sha ka sorkar jylla halor ki mat kiba la wan rah da kane ka kynhun ki seng nongrep ha ka jylla.

Kum ba la pynpaw da ki nongïalam ka Hill Farmers Union lyngba u Bah Alfondbirth Kharsyntiew kum u General Secretary bad u Bah Pynshai Masharing General Secretary ka HFU Ri Bhoi District, ïa ki mat ba la dawa da ka HFU rygnkat ki nongi sniang ki kynthup ban siew bai lutksan ïa ki sniang ba ïap na ka jingshah ktah ha ka khlam African Swine Fever, ban map noh ka ram ba ki shim na ki bank bad kynthup ban buh noh mardor ïa ka khyrdop ban talasi ïa ki mrad ba wan na shabar jylla bad ruh ban buh ïa kata ka jaka set kyrpang ïa ki jingri (Quarantine Centre) khnang ba kan nym ktah ïa ki jingri jong ki nongrep ha ka jylla.

Sa pule ruh: Nga La Bthah Ïa U DC Ri Bhoi Ban Ïa Kren Bad U DC Kamrup Ban Wan Phai Ka Suk Ka Sain Ha Maikhuli

U Bah Mayral Born Syiem kum u nongmihkhmat paidbah u la kular ruh ban shim khia halor kitei ki mat ba la wan rah da ka seng, ka dei ha ka jingïalang kaba la pynlong mynta ka sngi da ka Hill Farmers Union, Ri Bhoi District ha Madan Pahamsyiem ban ïa kren ne ïa thir halor ki jingeh jong ki nongrep bad khamtam ki jingeh ba ïa kynduh ki nongri sniang ha ka jylla na ka jingwan lynshop ka khhlam African Swine Fever.

Ha kane  jingïalang  la don ryngkat ruh ka District Veterinary Officer ka Ri Bhoi, ki ophisar na ka ophis u Deputy Commissioner bad kynthup ki nongri sniang kiba la shah ktah na ka jinglynshop ka khlam African Swine Fever.

Haba kren ruh ha kane ka jingïalang u Bah Mayral Born Syiem nalor ba u la kular ban shim khia ïa kitei ki mat ba la buh da ka seng, u la kyntu ruh ba ngim donkam ban ïakhih ne ïa pyrshah sorkar, hynrei tang da u thylliej bad ka ktien ngin ïa khun ban pynioh ïa  kitei ki mat ba la wan rah bad kata ruh ngin buh da ka kynhun ban ïa don lang na ka seng, ki nongri sniang bad kiwei dei ban dang pynsngew sha ka sorkar ba ka dei ban leh ei ei na ka bynta ka jingmyntoi ki nongri sniang bad ki nongrep ka jylla.

Sa peit ruh