Nga La Bthah Ïa U DC Ri Bhoi Ban Ïa Kren Bad U DC Kamrup Ban Wan Phai Ka Suk Ka Sain Ha Maikhuli

Nongpoh, Nailur 21: U MLA Jirang bad uba dei ruh u Myntri ha ka sorkar jylla, u Bah Sosthenes Sohtun, mynta ka sngi, u la hiar hi dalade ban leit jurip ïa ka shnong Maikhuli, da kaba pynlong ïaka jingïalang paidbah ha Madan Maikhuli, kaba dei ruh hadien ba la mih ki huri hura, hadien ba la don ki briew na Assam, kiba wan kyntur ïa u pud u sam ka Meghalaya lyngba ka Shnong Maikhuli.

Katei ka jingleit jurip bad pynlong jingïalang da u Bah Sosthenes Sohtun ha katei ka shnong, ka dei hadien ka jingjia kaba la jia haka sngi saitjain, ha kaba la don ki briew na Assam, kiba la wan pynpra ïa ka kynroh skul, nangta ban ker tala da kaba pakhang lynti da u siej ïa ka lynti ban rung sha Madan Maikhuli bad ruh ïa ka lynti shnong, kaba la wanrah ïa ka jingïakulmar hi thlim, namar ki briew shnong Maikhuli, khamtam ki longkmie, kiba la mih ban beh ïa kitei ki nong Assam bad kaba la poi sha ka jingïashoh ïadat.

Haba kren hadien katei ka jingïalang, u Bah Sosthenes Sohtun, u la pynpaw ïa ka jingsngewsih haba iohi ïa kiba kum kitei ki jingjia ba thmu wan kyntur pud bad kaba la ktah ïa ka shongsuk shongsain jong ki briew ha shnong Maikhuli.

Sa pule ruh: Ba La Jynjar Palat Ki Paidbah, Byrngem Ujor PIL Ka SSHL Lada Mynthi Ka Sorkar Ïaka Jingdawa Shna Surok

U la ong ruh ba ha kine ki por ba ladep, la don kata ka jingïakren ïasuk ne ka Peace Agreement, kaba la don da u Magistrate Ri Bhoi lem bad ki briew na Assam, na bynta ban pynneh ïa ka shongsuk shongsain ha katei ka thain, hynrei sngewsih ba ha katei ka jingïakren ïasuk, na ka Assam la wan tang da ki briew ki bym pat dei ha ka kyrdan Magistrate.

Namarkata, halor kane ka bynta nga la kren ïa u DC Ri Bhoi ba un kren bad u DC Kamrup, na bynta ban kren biang halor ka Peace Agreement hapdeng ki para DC, da kaba leit ruh sha ka thain Maikhuli, khnang ba kum kane ka jingjia ba kan nym jia shuh nangne shakhmat, u la bynrap.

Sa peit ruh