Nongpoh, Nailur 21: Haba kren sha ki nongthoh khubor hadien ba la dep ka jingialang paidbah ha madan shnong Maikhuli, u Bah Sosthenes Sohtun, MLA/MDC Jirang bad uba long kum u Myntri sorkar jylla, u la ong ba kum u nongmihkhmat ka thain bad kum ka sorkar, u la ai ka jingkular sha ki paidbah, ba un wanrah ia ka ktem Pulit ba shirta ha Maikhuli bad nalorkata, u la kular ruh ba un sa ialam ia ki briew na katei ka shnong, ba ki leit kynduh markhamat ia u Conrad K. Sangma, Myntri Rangbah ka sorkar jylla, khnang ba kin ioh ban pynsngew markhmat ha u Myntri Rangbah ia ki jingeh, ba kum ki briew na katei ka shnong, ba ki ju kynduh jingeh na ka por sha ka por.
Kum u Nongmihkhmat ka thain bad ka sorkar, nga sngewkhia haba iohi ia ka jingshah pyndik ki briew kiba shong ba sah ha khappud, kumta halor kane ka bynta nga la shimkhia bad nga la ai ka jingkular hakhmat ki paidbah, ba ngan leh ia kaba donkam khnang ba ki briew kiba shong ha khappud ba kin shongsuk shongsain.
Haba iadei bad ka jingjia ba wan kyntur pud ki briew na jylla Assam bad kaba la jia mynsngi Saitjain, mar ia ioh jingtip, nga la pyntip mar mar sha ki Symbud Myntri Rangbah, nangta sha u DC bad SP Ri Bhoi, khnang ba kin lah ban leh ia kaba donkam bad ban tem ia ki jingjia, kiba ktah ia ka shongsuk shongsain ki paidbah, ong ong u Bah Sosthenes Sohtun.
U Bah Sosthenes Sohtun, u la ong ruh ba ka sorkar kan sa iarap ban pynioh lad jingiarap kaba mardor, na bynta ban maramot ia ka kynroh skul ha Maikhuli, kaba la shah pynpra ha ka kor Puh shilum, kaba la wanrah da ki briew na Assam.
Sa peit ruh
[…] Also read: Kular U MLA Jirang Ïaki Paidbah Maikhuli Ban Buh Da Ka Ktem Pulit Bad Ban Leit Kynduh Ï… […]