Nongpoh, Risaw 17: Ka National People Women’s Front kaba dei ka kynhun ki longkmie jong ka Party NPP mynta ka sngi ka la ioh ban aiti noh ïa ka ïing thymmai sha u Heprit kaba la shna pynwandur bha bad itynnad haka shnong Tyrso Mawlamase ha ka jaka ba la ai sngewbha daka Tyrso Shnat Raid.
Kane ka jingpynshna ïaka iing kaba thymmai da ka NPWF jong ka Jylla ka dei lyngba ka jingiohi ïaka khana kaba la lum da u Jr. Story Teller Lyndon kaba la rung sha ki jingmut jingpyrkhat jong ki Nongïalam ka NPWF ban leh eiei na ka bynta ka iing jong une u Heprit.
Utei u Heprit u dei uba la tip kyrteng u Chesterwell Rynjah, khun jong ka kong Wandaphisha Rynjah ba shong ba sah haka shnong Tyrso Mawlamase bad u don lai ngut ki para.
Ka khana shaphang utei u Heprit Chesterwell Rynjah ka long ba haka rta kaba dang rit u la hap ban peit bad ban kit ban bah ïaki 3 ngut ki shipara namar ba ka kmie jong u ka hap ban leit bylla sha jngai bad utei u Heprit u hap ban lehlut ïaki kam iing nadong shadong bad ka lyngkor kaba u bah ka la pynlong ïa u ban long kum u kpa jong ka iing.
Na kane ka khana, Ki Nongïalam Ka NPWF ki la kut jingmut ban sei borbah dakaba pynshna noh daka iing kaba thymmai khnang ba utei u Heprit ryngkat ki para bad ka kmie jong u kin ioh ban sah bad ban lait naka lyer bad u slap.
Lyngba katei ka jingkut jingmut jong ka NPWF ryngkat ka jingïasnohktilang da u MLA ka Mawhati u bah Charles Marngar bad u bah Ransom Sutnga ki la lah ban pynïeng ïa katei ka iing thymmai kaba la ai haka kyrteng jong utei u Heprit Chesterwell Rynjah hakaba la ioh pat ban aiti noh hynne ka sngi haka jingïalang kaba lyngkot kaba la long ha ka shnong Tyrso Mawlamase.
Pule ruh: JAC Gives Meghalaya Government 10 Days to Scrap Shillong Ropeway Project
Ha kane ka jingïalang aiti ïaka iing, la wan ban sakhi da u MLA ka Mawhati u bah Charles Marngar, Ka kong Rona Khymdeit MDC Nongpoh, Kong Emi Kamilia Kahit State General Secretary NPWF, Kong Rosilia Makri, General Secretary NPWF Ribhoi, u bah Chesterfield Madur Rangbah Shnong Tyrso Mawlamase lem bad kiwei kiwei ki riew rangbah.
Ki nongkren ha katei ka jingïalang, ki la ai ka jingïaroh ïaka NPWF ba kum ki longkmie ka NPWF kiba long ki rishot kiba skhem jong ka imlang la sahlang ki la lah ban pynïeng ïa katei ka iing naka bynta utei u Heprit.
Ki la ïathuh ba katei ka longiing ka long shisha kaba jynjar bad ka ba dei hok ban ioh ïaka jingïarap bad ha kajuh kapor ki la ai ka jingïaroh ïa u Heprit Chesterwell Rynjah uba la kit ïaka lyngkor kaba khia naka bynta ki para bad kumjuh ïaka iing.
Peit ruh:
Khatduh, ki la kyntu ïaka kmie jong ka iing ba kan tei ïala ka iing ka sem halor jong u mawsiang ryngkat ka jingtip briew tip blei bad ki la kitbok ruh ïa katei ka longiing bad ïa u Heprit Chesterwell ba kin don barabor haka met kaba shait kaba khlaiñ.
