U myntri rangbah jong ka ri, u Narendra Modi mynta ka sngi u la pynlong ia ka jingialang kyrpang ban pdiang burom ia ki rangialehkai jong ka kynhun kriket T20 ka ri hapoh ka jingialam jong u Rohit Sharma kum u kapten, kiba la ioh khur ia ka nam lahduh ha ka T20 World Cup 2024 kaba dang shu dep shen ha ka ri Barbados.
Katei ka kynhun ialehkai kriket jong ka ri, hynne ka step mar ia hiar ha ka kad liengsuin jong ka nongbah Delhi, ki la leit beit beit sha ka ingsah ka jong u myntri rangbah ka ri, u Narendra Modi kaba don ha 7, Lok Kalyan Marg (7LKM) kaba ju tip ruh mynshwa kum ka 7 Race Course Raod.
Ha kane ka jingpdiang burom ia ki rang ialehkai kriket ka ri, u Narendra Modi u la ong ba ka jingkynduh bad ki lahduh (champion) ka long shisha kaba sngewtynnad bad pynpaw ruh ba u la ioh ia ka jingiakren kaba sah jingkynmaw halor ki jingshem jong ki lyngba kane ka lympung T20 World Cup, 2024.
Shuh shuh, la ioh jingtip ruh ba na ka liang jong ka Board of Control for Cricket in India (BCCI) kan sa pynlong ia ka jingiaid pynkup burom lyngba ka bos ia kane ka kynhun kaba ioh khur ia katei ka nam lahduh hadien da ki phew snem. Kane ka jingiaid pynkup burom lane kata ka victory parade lyngba ka bos kan sdang naduh na Marine Drive ter ter sha Wankhede Stadium jong ka nongbah Mumbai naduh ka por 4 baje janmiet shaneng.
