Ka Ïngbishar ba hakhlieh lane ka Supreme Court jong ka ri Japan ka la pynmih ia hukum ba ka sorkar kadei ban siew bai lutksan sha ki briew kiba shah lehbein ha ka jingshah pynkha khun jubor (forced sterilization surgery) ha ka ain ïakjakor kaba la tip kum kata ka Eugenics Law. Ka Ïngbishar ha ka hukum ka la ong ruh ba katei ka ain Eugenics Law, kadei kaba long pyrshah ia ka riti synshar treikam jong ka ri Japan, ong ka khubor na ka tyllong Japan Times.
Kane ka jingpynmih rai jong katei ka Ïngbishar, ka la pynsting bad pyllait hiar mynsiem ia kiba hajar ngut ki paidbah kiba la shah pynngat ha katei ka apot ban shah pynkha khun jubor khlem ka jingbit ka jongki bad ruh khlem da ai shwa kino kino ki jingpynshai. La iathuh ba bun na ki lanot, kidei kito kiba don jingshitom ha ka bor met bor phad bad ruh kiba don jingduna ha ki dkhot met ha ka por ba la bthah jubor iaki ban leh ia katei ka kam.
Kane ka rai jing katei ka Ïngbishar, ka la wanrah ruh ia ka dur ba phuh samrkhie ia ki hajar ngut ki briew kiba la shah pynngat jubor ha katei ka kam, kata hadien ka jingiakhun kaba neh da ki phew snem ba ki sa ioh ia ka jingbishar kaba hok.
La iathuh ruh ba ka rai jong ka Ïngbishar kadei kaba kynthup ia ki phra tylli ki mukotduma kiba la mudui ha Tokyo, Sendai, Osaka, Kobe bad Sapporo halor katei ka jingshah pynkha khun jubor kaba la pyntreikam naduh u snem 1948 tad haduh u snem 1996 lyngba katei ka ain ïakjakor Eugenics.
Kum ban shu kdew hangne, palat 25 hajar ngut ki briew ki la shah ktah ha katei ka ain ïakjakor, bad na kitei, kumba 16 hajar kidei kiba ka sorkar ka la shu leh jubor khlem ka jingmynjur ne jingtip jong ki trai kaba long ruh ka kam thok kam shukor bad kaba la leh ruh ha ki rukom ki bym long shngain.
Ha u snem 2019, ka Ïng Dorbar Thawain jongka ri Japan ka la mynjur ban siew bailutksan haduh 3.2 million ka pisa Japan sha manla uwei pa uwei na kiba la shah ktah ha ka ain ïakjakor Eugenics ha kaba na liang ka sorkar ka la pynmih ruh ia ka jingpanmap da kaba ong ba kum ki nongpyntreikam ia katei ka ain rew, ki dap da ka jingsngewsih bad panmap na ki paidbah kiba la shah kthah.
