Tang hadien ba ka HANM Ranikor Circle ka la ioh ia ki jingujor na kiba bun ki paidbah ka thain Ranikor, kane ka seng mynta ka sngi ka la leit ban jurip ia ki Jingkieng ha ka thain Ranikor, kaba dei halor ka jingkynnoh ba bun ki trok kit dewiong, eit dewiong kiba kit tam pud kaba la buh jingma ia kiba bun ki jingkieng dieng ha ka thain Ranikor.
Haba leit ban jurip ia kitei ki jingkieng la ialam da u Bah Brustar Thongni ryngkat ka jingdon lang u Bah B. Wahlang, uba dei u Vice President HANM SWKHD, ha kaba mynta ka sngi ki la leit ruh ban jurip ia ki jingkieng dieng ha shi lynter ka surok bah Ranikor, kaba ki la sdang naduh 18mer ter ter shaduh ka shnong Photkroh.
Ha kane ka jingjurip, ka seng ka la kam ba ka la lap la jan bun kine ki jingkieng dieng ki la sdang ban jor bad ka la buh jingma ruh ban iaid ki kali ba kit tam pud.
Kumba la pynpaw da ka seng, la ong ba ha kane ka jingleit jurip la lap ba ka tnad PWD, ka la dep ban buh ia ka jingthoh ba ki kali ba kit mar ne ki jingkit ki dei ban kit tang hapoh 9 ton bad ka long pat kaba sngewsih ba ki trok kim bud satia katkum kitei ki kyndon ba la buh, ha kaba ki dang bteng ban kit tam pud, kaba long ka jingma ia kitei ki jingkieng ba la sdang ban jot.
Namarkata, na ka liang ka seng HANM Ranikor Circle, ka la buh ka jingkyntu kaba jur ia ka sorkar bad ki bor pulit bad ruh ka tnad PWD ba ki dei ban tuklar lem mardor, halor ka jingiaid sahuh jong kitei ki trok kiba kit palat pud bad ka seng ka la maham jur ruh ba lada ki bor sorkar kim shimkhia ka seng kam banse ban shim da kiwei pat ki sienjam.
