U wei u rangbah naka shnong Khyndewso ha Ri-Bhoi u la duh noh syndon ïala ka jingim hadien ba u la shah iuh ha kawei ka Bolero Pick Up naki bynta jong u syngkai bad phet krad na katei ka jaka khlem don ba ioh bat satia ïa katei ka kali.
U tei u rangbah bala khlad noh la tip kyrteng kum u Risdar Mynsong (45) naka shnong Khyndewso bad halor katei ka jingjia kila don ruh ki paidbah kiba iohi ïa kawei ka kali Bolero kaba la iuh ïa utei u rangbah hynrei kim lah satia ban ithuh ïa u number bad katei ka kali tang hadien ba kala iuh ïa utei u rangbah kala phet krad noh na katei ka jaka.
Katkum ka khubor bala ioh lum ki Pulit ka Mawlasnai Police Outpost tang hadien ka jingioh jintip kila leit mar mar sha katei ka jaka ban pynlong ka jingtohkit bad ban lapdien ïa katei ka Bolero bad ïa utei u rangbah bala shah iuh haka bolero uba la mynsaw jur la pynkit noh mar mar sha Nongpoh Civil Hospital bad namar ka jingmynsaw kaba jur ki doctor kila pynbna ba u la khlad noh na kane ka sla pyrthei.
Shuh shuh ïa ka met jong utei u rangbah la rah ruh ban pyndep ïaka Post Mortem bad hadien la aiti noh ïaka met jong utei u rangbah sha ki bahaiing ba kin pyndep ka jinglehniam ba khatduh lashai ka sngi Saitjaiñ ha iing sah jong u kaba don ha Khyndewso.
