Halor ka jingkem ka tnad Forest ia uwei u rangbah jong ka shnong Belahari, ha ka thain khappud ka Meghalaya bad Assam ha Ri Bhoi District, u MLA ka Jirang Constituency mynta ka sngi u la dawa syndon mardor na ka tnad Forest ka Assam, ba ka dei ban pynlait noh mardor khnang ba kan nym ktah ia ka shongsuk shongsain ki paidbah ha kitei ki shnong khappud.
Une u rangbah ba la shah kem ha ka tnad Forest ka Assam, la tip kyrteng kum u Bah Bakstar Diengdoh, na ka shnong Belahari bad ka jingshah kem jongu ruh ka la long kumba la pynap shrip, ha kaba ka tnad forest ka Assam ka la khot ia kren ia sha ka ophis treikam jongka bad hadien ba la poi ha katei ka ophis treikam ka tnad Forest ka Assam ki la kem pynban ia u bad da kaba pynngat ruh ha ki kyndon bapher bapher.
Haba ia kren sha ki lad pathai khubor mynta ka sngi, u MLA ka Jirang, u Bah Sosthenes Sohtun, u la ong ba kum u nongmihkhmat paidbah ka Jirang, u pynpaw ia ka jingsngewsih bad ka jingpyrshah jur, halor kane ka jingshah kem une u rangbah ha ka tnad Forest ka Assam bad kane ka paw shai kdar ba ka tnad Forest Assam kam don kata ka jingiaburom ba mar kylliang wat la ka jingpynbeit pud ka dang iaid shaprhang hadpeng ka Meghalaya bad ka Assam.
U la ong ruh kum kane ka jingleh ka tnad Forest ka Assam, ka long kaba ym lah ban pdiang bad ka wan rah ruh ia ka kynrum ka kynram, kaba ktah ruh ia ka shongsuk shongsain ki paidbah ha khappud bad na ka bynta ka shongsuk shongsain ki paidbah, ka tnad Forest Assam ka dei ban pynlait noh ia une u rangbah khlem da pynngat ha kano kano ka kyndon ain, bad ruh ba kan don kata ka shongsuk shongsain ki paidbah ha khappud ka Meghalaya bad Assam.
Shuh shuh, u la ong ruh ba kum u MLA, u la dep ruh ban ia kren sha u Myntri rangbah ka jylla, u Conrad K. Sangma bad kumjuh ruh sha ki bor ba dei peit ka sorkar Meghalaya ba kin ia kren sha ka sorkar Assam na ka bynta ban pynlait noh ia une u rangbah khlem da teh kyndon bad na ka bynta ka shongsuk shongsain ki paidbah ha khappud, u la kyrpad ruh ia ka sorkar Assam ba ka dei ban pynlait noh ia une u rangbah, khnang ba kan nym ktah ia ka shongsuk shongsain ki paidbah ha katei ka shnong khappud, u la bynrap.
