Tang hadien ba ka seng Khasi Student Union kala pynieng biang ïaka khyrdop ILP ban talasi mynder haka sien kaba 3 ha ka shnong 20 mer, Pahammawleiñ ha Ri-Bhoi Distrist, ka seng kala phah ruh ka kyrwoh kaba shai sha ka sorkar ba ka KSU kan pyntreikam hi ïaka ILP nangne shakhmat, hadien ba ka sorkar kala shu leh kyllut ïaka jingdawa jong ka seng ban pnytreikam noh ïaka ILP bad kumjuh ruh ka Meghalaya Residents Safety and Security Act (MRSSA).
Haba kren sha ki lad pathai khubor naka liang u Samla Lambokstarwell Marngar President ka KSU sengkmie u la ong ba ka jingkuman jong ka sorkar India ïaka jingdawa jong ka jaitbynriew, ban pyntreikam ïaka ILP kam dei shuh ka rai ki sengbhalang hynrei ka 19 tarik Nohprah 2019 ki 60 ngut ki MLA kila shim lang kajuh ka sur ban pyntreikam ïaka ILP haka jylla.
U la ong ruh ba ka jingbteng biang jong ka seng mynta ka sngi ban buh ïaka khyrdop ILP bad ban khynra mynder ka dei tang ka jingsdang ban bteng ïaka jingiakhih ban pynsngew ïaka sorkar, lada ka sorkar kan iai kuman bad matlah ïa kaei ka jingdawa phin sa iohi ha kine ki sngi da kiwei pat ki lad ki lynti kumno ban bteng bad ban pynrhem ïa kane ka jingdawa bad donkam ruh ka jingkyrshan lang jong ki Dorbar Shnong.
“Tang khyndiat kynta ym duna shuh kumba 100 ngut ngi pynphai bar jylla ba khlem kot khlem sla, ka jingïai kuman jong ka sorkar jylla ban pyrkhing ka pynlong ruh ïaki nonglute naka jylla Assam ban wan leh ki kam bymman sha kane ka jylla ha Ri-Bhoi kumba ki pulit kila ioh kem dang shen, ha nongbah Shillong la ioh kem ïaki khar Bangladesh, bad kaba kham sngew shyrkhei ka dei ka jingjot ki samla ha u drok, hynrei balei ka sorkar kam shimkhia?” la buh jingkylli u Bah Lambok.
U la ong ruh ha kine ki sngi ban wan ka seng kan sa bteng biang ban khynra kham sharum shaduh ki thaiñ Byrnihat, bad khmih lynti ba ka sorkar ka hap ban jubab bad lada ngi hiar biang sha madan ka sorkar kam dei ban pynthut ïaki dkhot ka KSU namar ngim lah shuh ban ap sah ïaka jingleh kyllut ka sorkar ngin pyntreikam hi ïaka aiñ mynta la ka long ha kano kano ka rukom.
Shuh shuh u la ong ruh ba ka sorkar ka ong ba ngim dei ban shim iaki aiñ haka kti hynrei ka jingkylli ka long ba ïakita ki aiñ bala don lypa ka sorkar ka leh aiu, ki leh aiu kita ki nongthaw aiñ ba u paidbah u la jied ïaki ban phah shapoh secretariat, khlem shym la phah ïaki ban sign tender, ban thep kam kontrak shane shatai, hynrei ngi phah ïaki ban thaw ka aiñ bad ka seng da ki phew tylli ki snem kala ïakhun kala iai dawa bad khmih lynti ba nangne shakhmat ngi donkam ruh ka jingïatreilang bad ki bor shnong bor thaw.
Naka liang u Bah Lambokstarwell Marngar u la ther tyngeh ruh ïaka tnad Infiltration ha Byrnihat ka long kum ka shynrong khlem jabieng, namar ki pulit ba don ha katei ka jaka khamtam haka por mynmiet kim ju talasi ïaki kali ne ki kot ki sla hynrei ki shu ba ka light, bad kane ka jingkynnoh baroh ka dei ïaka sorkar namar ki briew ki ioh ban rung ban mih laitlan sha ka jylla khlem kino kino ki aiñ ba teh pyrkhing, u la bynrap.
