Da ki spah ngut ki paidbah nongshong shnong mynta ka sngi, ki la ialum hajan ka jingkieng Wah Umkhen, na ka bynta ban ia pyrshah jur halor ka jingthmu ka sorkar jylla ban wan rah ia ka jaka bret ñiut ha Nonghali ha ka jaka ba la tip kum ka Lumsohlait Nonghali.
Ia kane ka jingialang paidbah la pynlong da ka Synjuk ki Nongsynshar Shnong Par Umkhen, na ki 3 District kata ba kynthup East Khasi Hills, Ri Bhoi bad West Khasi Hills, ki ban sa shah ktah lada wan rah ia kate ka jaka theh niut ha Nonghali.
Ha ka lama jong ka synjuk ki shnong kiba la ia pyrshah ia kane ka jingthmu ban buh kum ka jaka theh niut ha Nonghali ki kynthup ia ka shnong Nonghali, Mynriang, Nongkhroh, Bamkamar, Thadrang, Khlieh Umwang, Madan Umwang, Umtlieh, Ummluh, Khyndewso bad kiwei kiwei ki shnoing.
Ha kane ka sngi, nalor ki paidbah nongshong shnong la wan shim bynta ruh da u Bah Arwin K. Sutnga, u nongsait ain ka jylla, u Bah Blikshon Sohtun bad kynthup ruh kiwei kiwei ki nongialam shnong na kitei ki shnong.
Kumba la paw ha kane ka jingialang paidbah ha wah Umkhen, ka sur kaba jam ka la mih ba ki la rai ban pyrshah jur ban wan rah ia katei ka jaka theh niut ha Nonghali, kaba dei ka jaka harud ka wah Umkhen, kaba don tang kumba 100 meter ei ei na ka wah Umkhen kumba la pynpaw ha kane ka jingialang paidbah.
Ka sur uba bun balang bad naduh ki nongialam ruh ki la pynpaw ia ka jingpyrshah kaba jur, ba kumno ka sorkar kan wan ban pynlong ia katei ka jaka theh niiut harud ka wah Umkhen, namar ka wah Umkhen ka dei kawei na ka wah kaba kitei ki shnong ki pyndonkam na ka bynta ban sum ban sait bad dih ban bam bad na ka byntna ka rep ka riang bad kiwei kiwei jingdonkam.
Lyngba jong kane ka jingialang paidbah, ki la shim beit kawei ka rai ban pyrshah jur bad ruh ba la dawa na ka sorkar ba kam dei ban wan rah ia katei ka jaka theh niut ha katei ka shnong Nonghali bad lada ka sorkar kam sngap ia ka sur ki paidbah kim banse ban shim da kiwei pat ki lad ba tyngeh ban ia pyrshah halor kane ka jaka theh niut ba la thmu ban wan rah harud ka wah Umkhen, kaba dei kawei na ka wah kaba paw bad kaba don ki dohum dohwah ba ju pynim jakpoh ia kitei ki Shnong
