Ka Meghalaya Pradesh Congress Committee (MPCC) mynta ka sngi ka la pynkup burom ia u Saleng Sangma kum u MP ka jylla, kaba dei hadien ba u la long u nongjop ha ka Election MP ban mihkhmat sha Lok Sabha kaba dang shu dep shen ha ka ri India.
U Saleng Sangma u la pynrem noh ia ka Agatha Sangma, ha ka election MP sha Lok Sabha, kaba dang shu dep na ka Tura Parliamentary Seat bad na ka liang ka MPPC mynta ka sngi ka la pynkup burom ia u Saleng Sangma kum ka jingleh burom halor ka jingshah jied jong u kum u MP ban mihkhmamt ia ka Tura Parliamentary Seat ha ka ïing Dorbar thaw ain ha Lok Sabha.
Ia kane ka jingpynkup burom la pynlong mynta ka sngi ha State Central Library, ha kaba la wan ban shim bynta naduh u Ma Vincent H. Pala kum u President ka MPCC, u Dr. Celestine Lyngdoh, MLA ka Umsning, u Bah Charles Marngar, MLA ka Mawhati, u Bah P.N Syiem, MDC ka Congress, ki nongialam na ki District bapher bapher bad ruh ryngkat ka jingdon lang u Saleng Sangma, uba la shah pynkup burom ha ka party, halor ka jingjop, kaba u la jop kum u MP ba thymmai ka Tura Constituency.
Ha kane ka sngi, la leh burom ruh ia u Saleng Sangma lyngba ki syntiew ki skun bad ki jingai sngewbha bad ha kajuh ka por ruh la pynphuh pynphieng ha kane ka sngi, da ki jingshad tynrai bad ki jingrwai na ka kynhun ki samla jong ka party Congress.
Ha kane ka sngi, na ka liang ki nongialam ka MPPC ki la ai jingaroh ia u Saleng Sangma bad ki la ai ruh ka nam ka burom da kaba pynkup burom ia u bad ki khmih lynti ruh b aune u MP na Tura un ia kren ia ki jingeh ka jylla ha Lok sabha khnang ban dang wan rah shuh shuh ia ka jingkylla hapoh ka jylla Meghalaya.
Na ka liang u Saleng Sangma, kum u MP na Tura, u la pynpaw ia ka jingsngewnguh ia ka MPP bad ka party, kiba la pynkup burom ia u Kum u MP na Tura u la kular ruh ban kren ia ki jingeh ki paidbah ym tang na Garo Hills bad ruh ha ka jylla hi baroh kawei, ba ia ki mat ki jura jong ka jylla un sa kren ha Lok Sabha bad ruh ba ka sorkar pdeng kan phai khmat leh ia ki jingdonkam jong ki paidbah ka jylla Meghalaya.
