U Superintendent of Police ka East Jaintia Hills, u Giri Prasad ha ka jingpyllait khubor mynta ka janmiet, u la pyntip ba uwei na ki saw ngut ki bar jyll kiba la shah pyniap dusmon hadien jong ka iew Umpleng kaba dang hap hapoh ka jingkhmih jong ka Umpleng Anti Dacoity Camp jong ka East Jaintia Hills District, la tip kyrteng kum u Ravi Rai, 23 snem ka rta na ka shnong Pastha Elam jong ka ri Nepal.
Utei u heh pulit ka East Jaintia Hills District, u la pyntip ruh ba halor katei ka jingshah pyniap kaba la pynpar niangkhriat jong kitei ki saw ngut, na ka liang jong ki bor pulit ki la thaw ruh da ka jingtohkit kaba kyrpang, ka Special Investigation Team (SIT) ban pynlong ia ka jingtohkit bniah halor katei ka jingjia na ka bynta ban iohkem ia ki briew kiba donkti ia katei ka kam runar.
