Kumba 114 tylli ki mrad kiba don hapoh ka Kaziranga National Park jong ka jylla Assam ki la iap jyllop noh namar ka jingshlei um ha katei ka jaka ri mrad kaba la neh mynta la bun sngi lynter. Ki bor ba dei khmih jong ka tnad Forest katei ka jaka, ki la iathuh ruh ba kumba 95 tylli ki mrad la ioh ban pynlait im mynta ka sngi bad pyntip ruh kumba 44 percent jong katei ka jaka ri mrad ka dang shah tap haka um haduh mynta.
Katei ka jaka ri mrad kaba dei ruh kawei na ki UNESCO World Heritage Site, kadei ka jaka ka don ia shibun jait ki mrad, hynrei naduh ka jngther jong u slap bad ka jingshlei um, bun na ki mrad ki sdang ban phet sha ki jaka kiba kham long lum jong ka thain Karbi bad kiwei kiwei ban lait na ka jingiap jyllop.
Na kitei ki 114 tylli ki mrad kiba la iap, la iathuh ba kiba shah ktah jur eh kidei ki Skei (Hog deer), ha kaba 95 tylli ki la shu iap jyllop kynthup ruh ia saw tylli ki Kyndad (Rhino) bad kiwei kiwei de ki jaid mrad.
