Ka khubor jong ka jingshah pyniap uwei u samla na rilum Garo hapoh kawei ka jaka ai jingsumar ia kiba la ngop ha u drok ha Goalpara District jong ka jylla Assam ka la pur sted bad wanrah ia ka jingpynrem jur na kiba bun ki paidbah khamtam hadien ba la kynnoh ba utei u samla u khlem iap da kaba phasi, hynrei u la shah pyniap dusmon ha kiwei pat ki briew kiba dei ki nongtrei bad kiwei de ki para ba shah sumar lang ha katei ka jaka ai jingsumar kaba la tip kum ka New Life Foundation.
Katkum ka tyllong khubor kaba la ioh lum, la iathuh ba utei u samla na rilum Garo uba la tip kyrteng kum u Niksamseng Ch Marak, u la mih na la ing ha ka 2 tarik jong u bnai Naitung, 2024 ban leit sha ki bynta jong ka sor Guwhati lem bad ar ngut kiwei de ki paralok kiba u ia ithuh ithaw, hynrei ki la shah bat noh ha ki pulit ka Krishnai Police Station jong ka Goalpara District halor ka jingkynnoh ba ki rah drok.
Ha ka 3 tarik jong u bnai Naitung, 2024, ki bahaing utei u samla kila kynnoh ba ki pulit katei ka Krishnai Police Station, ki la leit buh noh ia kitei ki lai ngut sha ka jaka ai jingsumar ia ki briew kiba la ngop ha u drok, kaba la tip kum ka New Life Foundation ha Goalpara District jong ka jylla Assam khlem ka jingioh jingmynjur ne jingbit jong ki bahaing hasem bad ruh na ka Ïngbishar.
La iathuh ruh ba ha ka 4 tarik jong u bnai Naitung, 2024, ki bor ba dei khmih ia katei ka New Life Foundation, ki la pyntip kyndit sha ki bahaing ba utei u samla u la phasi ialade hapoh ka kamra sum jong katei ka jaka ai jingsumar.
Na ka liang kitei ki bahaing namar na ka jingbym sngewlah ngeit ia katei ka jingkam jong katei ka New Life Foundation, ki la ap ia ka kaiphod jong ka post-mortem bad ha katei ka kaiphod post-mortem, ki doctor kila thoh ba kam don satia ka jingphasi, hynrei utei u samla u la khlad na kiwei pat ki daw.
Ki bahaing hasem jong utei u samla, ki la kynnoh ruh ba nyngkong, ki bor ba dei khmih katei ka New Life Foundation, ki la kam ba u phasi ialade, hadien ki kylla ktien biang bad kam ba u la tied iala ka jong ka khlieh ha ka kynroh tad haduh ba un da khlad syndon, kaba la nang pynartatien bad pynbitar shuh shuh ia ki bahaing hasem.
Na ka met jong utei u samla, ki bahaing ki la iohi pynban ia ki dak shoh, dak mynsaw la kumba dung da ki kynja tiar ba nep ha kiba bun ki bynta jong ka met bad ym kumba la kam da ki bor pyniaid katei ka New Life Foundation ba u la pyniap hi ne ba u leit ban tied ialaka jong ka khlieh ha ka kynroh.
Halor kane ka bynta na ka liang ki bahahing utei u samla ryngkat bad ka Achik State People’s Front (ASPF) ha ka 5 tarik jong u bnai Naitung, 2024, ki la ujor da ka ejahar pyrshah ia katei ka jaka ai jingsumar bad ha ka jingsdang tohkit jong ki pulit ka Goalpara Sadar Police, la iohi lyngba ki dur khih CCTV ba utei u samla u la shah tied shah bom ha ki nongtrei bad kiwei de kiba shah sumar lang ha katei ka New Life Foundation.
Kumba phra ngut ki briew kiba donkti ha kane ka kam runar, ki la shah kem noh ha ki bor pulit ka Goalpara Sadar Police kiba kynthup ia u Pranjyoti Nath, Hanif Ali, Jintu Chakraborty, Mohsen Khan, Kunal Das, and Dhanmoina Banikya bad ar ngut kiwei pat bad ka jingthwet sa ia ar ngut kiwei pat kiba la phet rieh ka dang iaid shakhmat.
.
