Ka Wisdom Centre kaba don haka shnong Umdihar ha Ri-Bhoi kawei naki jaka ai jingsumar bad syllok ïaki samla kiba la ngop bad kyrni haki jingdih buaid khamtam u drok, kala pynkut noh ïaka prokram ba kyrpang jong ki samla kiba dang don hapdeng ka jingshah sumar bala tip kum ka Wisdom Week 2024 haka 6 tarik Naitung ha Umdihar.
Ïa katei ka Wisdom Week la wan ban ai ai mynsiem bad pynhap pyrda noh ïaka da u Bah Brightstarwell Marbaniang MLA ka Mawlai kum u kongsan haka jingdonlang u Pastor David Jamir Director ka Wisdom Centre, ki samla kiba dang don hapdeng ka jingshah sumar ban lait na ki jingdih buaid ryngkat ki bahaiing hasem jong ki.
U Pastor David Jamir u la ong ba ka jing seng jong u ïa katei ka shlem ban lum ban lang ïaki samla bala ngop bad kyrni haki jingdih buaid khamtam u drok ka long ban ïarap ïaki ban sei biang naka ahor kaba kila im haka jingim jong ki, namar bunsien ki samla ki ksaid ki wad lad kumno ban lait na utei u jingdih buaid bad ban lait na u ki donkam ki nongïarap kiba syllok ïaki khamtam ban phai khmat sha u Blei.
U la ong ruh ba ka jingpynlong ïa katei ka taiew lehkmen ki samla ne ka Wisdom Week ka long kum ka jinghikai ïaki samla ban tip ïaka sap kaba rieh haki nmar baroh ka jingim jong ki kila pynlut por bad u drok bad kiwei ki jingdih buaid, kim don shuh ka jingpyrkhat ïaka lawei bad ka sap kaba rieh hapoh jong ki hynrei lyngba katei ka shlem ai jinghikai bad kumjuh ruh kitei ki jait prokram ba ju pynlong man u snem ki samla ki lah ban pyni ïaka sap kaba ki don haka jingim jong ki bad lehse lyngba katei ka sap ki lah ban thaw thymmai ïaka jingim jong ki bad ka lawei ka jong ki.
U Bah Brightstarwell Marbaniang kum u kongsan haba kren hakatei ka sngi u la ai ka jingïaroh ïa u Pastor David Jamir u riew shimet u ba la sdang ïakatei ka shlem ban lum ban lang ïaki samla kiba la ngop ha u drok bad lyngba katei ka shlem yn lah ban thaw dur biang ïaka jingim jong kiba bun ki samla bala ngop ha u drok.
U la pynpaw ruh ka jingsngewkmen ban iohi ba ki samla ki ioh ban pynlut haki prokram bad ki jinglehkai sports bapher bapher ha katei ka shi taiew lynter bad katei ka hi kan pynklet ïaki ïaka jingim barim namar dei tang ka jingkut jingmut kaba lah ban thawdur bad pynlait ïaki na utei u jait jingdih buaid, ban phai khmat sha u Blei ban im ka jingim ba thymmai.
U la kyntu ruh ïa ki khun samla ha kylleng ka jylla ba horkit hordang kim dei ban ktah lane ban mad ïa utei u jait jingdih namar sien bala mad la eh ban bthat ïa u kynjri bad un pynlong mraw haka jingim jong uto u briew ba dih ïa u bad kane ka ktah ym tang ïaka met ne ka koit ka khiah jongu ba dih hynrei ka pyndik ïaka iing ka sem bad ka imlang ka sahlang.
