Ha kawei ka jingjia twa khyndew kaba jia mynta ka sngi ha ka surok bah National Highway 6 ha Ri Bhoi District ha ki bynta kiba dang hap hapoh ka shnong Umsamlem, ka don ka jingdheng kali kaba la neh kumba katto katne por naba shilliang jong katei ka surokbah kaba kiew sha ka nongbah Shillong ka la shah tap noh ha ka khyndew.
Katkum ka tyllong khubor kaba la iohlum, la iathuh ba na ka liang ki pulit pyniaid kali ka Ri Bhoi District, ki la hap ban pyniaid ia ki kali tang shilliang jong ka surok bah, kata na ka liang jong ka surok kaba hiar sha ka nongbah Guwahati na Shillong.
La ioh jingtip ruh ba namar kane ka jingpynbeit ia ka rukom iaid kali tang shilliang jong ka surok, ka la don ruh ka jingiatyngkhuh jong ki ar tylli ki trok ha ki bynta jong ka shnong Quinine, hynrei donbok pat kam shym la don kano kano ka jingjia ba sngewsih, lait noh tang ka jingjulor jong ki kali.
La iathuh ruh ba na ka liang jong ki pulit ka Ri Bhoi ki la shimkhia ban pyniaid beit iaid ryntih ia kitei ki kali kiba la sahkut ha katei ka jaka bad ruh na ka liang ki bor ba dei khmih jong ka National Highway Authority of India (NHAI), ki la wan poi ha katei ka jaka ban weng bad pynkhuid ia katei ka khyndew kaba hap hapoh ka surokbah.
Shuh shuh, la iathuh ruh ba ha kane ka jingtwa khyndew ha katei ka jaka, kam shym la don satia kano kano ka jingjia ba sngewsih ne ka jingjulor ia ki kali kiba leit ba wan lyngba katei ka surokbah.
