Haduh 104 ngut ki pulit Unarmed Branch bad 7 ngut ki Follower bala pyndep ïaka jinghikai, mynta ka sngi kila shah pynkup burom haka 4th Batch Passing Out Parade jong ki Unarmed Branch Recruit Constables bala pynlong ha Armed Police Training Centre jong ka 6th Battalion kaba don ha Umran, Ri-Bhoi District.
Ïa kitei ki pulit bala dep pyntbit la wan ban pynkup burom da ka kong Idashisha Nongrang Director General of Police ka jylla kum ka kongsan haka jingdonlang u Ritu Raj Ravi Commandant ka 6th MLP Battalion, APTC Umran, ki heh pulit ophisar naka jylla bad ki bahaiing hasem jong kitei ki pulit bala pyndep jinghikai.
Ha katei ka sngi naka liang kitei ki pulit ophisar kiba la pyndep ïaki jinghikai kila shim bynta ruh ïa ka parade ha kaba ka DGP kum ka kongsan u la shim ïaka salute.
Haba kren ha katei ka sngi naka liang ka DGP ka kong Idashisha Nongrang ka la pynpaw ia ka jingsngew sarong bad ai khublei ia ki 104 ngut ki pulit langrut kiba thymmai kiba la pyndep hok ia ka jinghikai ba sdang jong ki, hadien ba kidei ruh ki dkhot ba thymmai jong ka longiing ki pulit ka Meghalaya.
Kala ai ruh ka jingkhublei ba kyrpang ïaka Armed Police Training Centre bad baroh ki nonghikai kiba don bynta ban trei shitom bad aiti lut ban pynthikna ïaka jingjop jong ki pulit kiba la rung thymmai haka kam, kumba ha kane ka juk ba mynta ki samla kiba thep ïaka kam Constable ki dei ruh kiba la pass ïaki kyrdan ba kham shalor kum ka Graduate bad Post Graduate namar haki por ba mynshuwa ym ju kham don koit ki samla ba la pass ïaki kyrdan ba shalor ban thep kitei ki post.
Haba pynkut, naka liang ka DGP Nongrang ka la kyntu ruh ïa kitei ki nongtrei thymmai jong ka tnad pulit ba kin bat ïa ki kyndon, ban shakri da ka akor ka burom haka kam bala bynshet haki bad kumba la hikai bad shim ruh ïaka parade bad ka jingbam smai la khmih lynti ruh ba kin ai ka shakri hok haka tnad pulit jong ka jylla haki sngi ban wan.
