Ka Khasi Hills Autonomous District Council (KHADC) haka jingialang jong ka Executive Committee mynta ka sngi, ka la shim ia ka rai ban rah ia ka kaiphod jong ka Delimitation Committee lem bad ka Amendment Rules 2024 ha ka dorbar jong ka Council kaban sdang naduh ka 10 tarik haduh ka 12 tarik jong u bnai Naitung, 2024.
U Deputy Chief Executive Member jong KHADC, u Bah Pynshngain N Syiem u la iathuh ba kadei ka ka kamram jong ka EC ban ban iatai bad iakren sani bha ha shwa ban rah ia kano kano ka kaiphod sha ka dorbar jong ka Council bad pyntip ruh ba ha kane ka jingialang, da kawei ka sur, la mynjur ban rah ia ka kaiphod jongka Delimitation Committee lem bad ka Amendment Rules 2024 na ka bynta ban pynlong ain iaki.
U tei u nongialam ka KHADC u la pyntip ruh ba ha katei ka dorbar jong ka Council, yn rah ruh ia ka Amendment Rule 6, Sub Rule (iii) jong ka Election Rule ka Council, naba ha ka kyndon (ii) kala kdew halor ki 29 tylli ki konstitwensi ba hap ban sei ia ki katto katne ki tylli ki shnong ban bynrap pat sha kiwei ki konstitwensi.
Ha kaba iadei bad ka Delimitation Committee, u Bah Pynshngain N Syiem u la iathuh ba katei ka komiti ka la ialeh katba lah ban pyndep ia ka kamram kaba la bynshet haka, hynrei ki don pat ki konstitwensi kiba kam ioh ban leh eiei namar ka jingbym ioh jingkhein ia ki nongthep vote.
“Ki don ki konstitwensi kiba don bun ki nongthep vote kum ka Mawlai, la pynbeit ban bynrap noh sha Jaiaw bad Pynthorumkhrah, hynrei kum ka Mawprem, Laban bad Nongthymmai ba duna ki nongthep vote, la pynbeit ban rah lang noh sha Laitumkhrah” la iathuh u Bah Pynshngain N Syiem da kaba bynrap ba ia ki jingtip ba kham bniah yn sa lah ban tip tad haduh ba la rah ia ka kaiphod hapoh ka ing dorbar.
Shuh shuh, u Bah Pynshngain N Syiem u la pyntip ruh ba ha kane ka jingialang kaba la pynlong mynta ka sngi, la iatai ruh halor ka mat jong ka Majai ha kaba na liang u Executive Member ka KHADC ba dei khmih ia ka tnad Elaka u la iathuh ba na ka liang ka Council shen kan sa khot jingialang bad ki nongialam jong ka Hima Sohra ban iakren halor kane ka bynta.
