Ka Khasi Students Union sengkmie lyngba ka Education Cell, ki la leit ban ia kynduh mynta ka sngi ia ka myntri ka tnad ka koit ka khiah, ka Dr. Ampareen Lyngdoh, kaba dei hadien, ba ka myntri ka la khot ia ki nongialam ka KSU ban ai jingshai halor ki mat ba ka KSU ka la pan jingshai na ka bynta kito ki Samla kiba ka kwah ban pule MBBS lyngba ka bhah jong ka sorkar jylla (State Quota).
Haba ia kren bad ki la pathai khubor, u Education Secretary ka KSU jong ka education cell, u Samla Pynkmenlang Sanmiet, u la ong ba kane ka jingialang ba la khot da ka myntri, ka long ban pynshai halor ia ka shithi ba la phah da ka KSU sha ka myntri, kiba ia dei bad ki samla kiba thmu ban pule MBBS lyngba ka bhah na ka sorkar jylla.
“Na kane ka jingialang la ioh lad ban ia kren sani bha, halor ka jingmang bhah kyrpang ia ki samla pule na ka jylla, na ka bynta kito ki samla kiba kwah ban pule MBBS lyngba ka state quota bad na ka liang ka myntri ka la pynshai kumba long mynta kam pat lah ban ai jingshai kaba thikna, namar ha kaba ia dei bad ka NEET ka dang don hapdeng ka jingbishar na ka ïingbishar bahakhlieh duh ka ri” ong u Samla Pynkmenlang Sanmiet.
U la iathuh ruh ba ka seng ka la ioh lad ruh ban ia kren shaphang ki samla, kiba la pyndep ia ka jingpule doctor na ka bhah jong ka state quota, kaba kim treh pat ban wan trei ha ka jylla bad kum ka seng ka la dawa jur ruh na ka myntri ka tnad koit ka khiah ba ki dei ban wad ia kine ki samla ba la pyndep ia ka jingpule doctor na ka bynta ban shakri ha ka jylla kum ki samla ba pyndep ban pule doctor ban ai ka jingshakri hapoh ka jylla.
Na ka liang u Bah Pynkmenlang Sanmiet, u la pynpaw ruh ba ka seng ka la ioh ruh ban ia kren bad ka myntri ka tnad ka koit ka khiah, halor ka jingduh bhah ki samla trai jylla, kiba la hap ban rung sha ka ‘open category’ bad ruh la ia kren ban pynthikna ban tehlakam na ka jingwan shim kabu ki briew kiba ym dei ki trai jylla ban ioh rung lyngba ka bhah jong ka state quota. Kane ka dei ruh kumba la sei madan da ka KSU halor u samla bar jylla na Jowai, uba la ioh rung ban leit pule doctor lyngba ka bha jong ka state quota, u la ong.
Shuh shuh, lyngba kane ka jingiakynduh lang hakhmat ka myntri, ka KSU ka la ban khia ruh hakhmat ka myntri ba ka sorkar jylla, ba kan shim khia noh na ka bynta ban pynurlong ia ka Medical College ha ka jylla, khnang ba kan long ka jingiarap kaba khraw ia ki samla trai jylla lyngba ka jingdon katei ka Medical College, u la bynrap.
