U myntri rangbah ka jylla, u Conrad K Sangma mynta ka sngi u la thoh da ka shithi sha u myntri rangbah ka jylla Assam, u Himanta Biswa Sarma ban phah tuklar mardor halor ka jingshah pyniap dusmon jong uwei u samla na ri lum Garo, uba shong ba sah ha ka nongbah Tura ha ka jaka ai jingsumar ia ki briew kiba la ngop ha ki jingdih lane kata kaba ki ong ka rehabilitation center ha ka ktien nongwei ha ka 4 tarik jong u bnai Naitung, 2024 ha ka jylla Assam.
Kum ban shu pynkynmaw, u Niksamseng Ch Marak, u la shah kem ha ki bor pulit ka Assam ha ka 2 tarik jong u bnai Naitung, 2024 halor ka jingkynnoh ba u don bynta ban rah drok, bad ha katei hi ka miet, ki bor pulit ki la leit buh noh ia utei u samla sha ka jaka ai sumar ia kiba la ngop ha ki jingdih, kaba la tip kum ka New Life Foundation Centre, kaba don ha Nayapara jong ka Goalpara District ka jylla Assam khlem ka jingioh jingbit na ki bahaing hasem ne ka Ïingbishar.
Tang shisngi hadien ba la leit ban buh ia utei u samla sha katei ka jaka ai jingsumar, ki bor pyniaid katei ka jaka, ki la kam ba utei u samla u la phasi ialade bad kylla ktien pat hadien da kaba kynnoh ba u la tied iala ka jong ka khlieh hapoh ka kamra sum haduh ba un da khlad syndon.
Na ka liang ki bahaing hasem, ki la pyrshah jur halor katei ka jingkam jong katei ka jaka ai jingsumar bad pynpaw ruh ba kim ngeit satia ia katei ka jingbatai kitei ki nongpyniaid katei ka jaka ai jingsumar, naba ki la suba jur ba kadon kaei kaei sha lyndet bad hadien ka jingtohkit ki pulit ka Goalpara Sadar Police, la lap ruh ia ki sakhi lyngba ka dur khih CCTV jong katei ka jaka, ha kaba la iohi ba utei u samla u la shah shoh dusmon ha ki nongtrei bad kiwei de ki briew kiba shah sumar ha katei ka jaka.
Dei halor kitei ki Nongrim, na ka liang u myntri rangbah ka jylla, u Conrad K. Sangma, u la shim khia ban phah syndon da ka jingthoh sha u myntri rangbah ka jylla Assam, ban dawa ba udei ban phah tohkit bniah bad ban thung da ka kynhun tohkit kaba kyrpang, khnang ban lap ia ka jingshisha baroh halor ka jingiap jong utei u samla na ri lum Garo.
Katkum ka shithi jong u myntri rangbah ka jylla u la iathuh ba na ka liang ki bahaing ki la pyntip ba ki bor pyniaid katei ka New Life Foundation Center, ki la kam ba u Niksangsem Ch Marah, u la pyniap ia lade da kaba phasi bad hadien pat ki la kylla ktien da kumwei pat, kaba la wan rah ka jingsngew artatien bad jingbym don jingshanniah shuh.
U Myntri rangbah ka jylla, u la iathuh ruh ba katkum ki jingtip kiba u la ioh, la lap ia ki dak mynsaw ha ka met jong utei u samla, kynthup ia ka dak dung tari ba mynsaw ha ka khmat kadiang jong u, ki dak jingmynsaw ha ka tmoh, ha syngkai bad ruh ha ki bynta jong ka kjat.
Kine ki dak mong ne ki dak mynsaw, la suba ba utei u samla Niksamseng, u la shah pynshitom bein, shah shoh shah dat bad shah bom jem ha ki nongtrei bad nongshahsumar katei ka New Life Foundation, la pynpaw u Myntri rangbah ka jylla ha ka shithi kaba la thoh sha u Myntri rangbah ka jylla Assam, u Himanta Biswa Sarma.
Namar kata, na ka liang u myntri rangbah ka jylla, u Conrad K. Sangma, lyngba katei ka shithi kaba u la phah sha u myntri rangbah ka jylla Assam, u la kyrpad jur ba u dei ban phah tohkit bniah bad ban thung da ka kynhun tohkit ba kyrpang halor katei ka jingjia, kumba la kwah da ka ïing ka sem utei u samla na ka bynta ban ioh iaka jingbishar kaba hok.
