Ka jingïakhun ba shongshit bad pyndait bñiat hapdeng ka Spain pyrshah ïaka France kaba la long hynne ka miet kaba dei ruh ka Semi Final ba nyngkong jong ka lympung Euro Cup 2024, ka dei shisha ka jingïakhun kaba itynnad bad ha katei ka jingïakhun ka Spain ka la lah ban pynliem ïa ka France da 2-1 kol bad ka la long ka kynhun kaba nyngkong eh ban ïoh rung sha ka phainal jong ka Euro Cup 2024.
Haba phai khyndiat sha ka jingïakhun kaba la long hynin ka miet ha Munich Football Arena, ki paidbah kila dap smam ha katei ka madan ban sakhi ïaka jingïakhun Semi Final ba nyngkong hapdeng ki kynhun ba khlaiñ bor ka Spain pyrshah ïaka France bad tang haka minit ba 8 jong ka kylla step ka France kala ioh ïaka kabu ban pynkhih nyngkong ïaka jar lyngba u Randal Kolo Muani bad hapdeng ka jingïakhun doh iap ban beh ïaka thong ka Spain kala ioh ban pynphai noh ïa katei ka shi kol haka minit ba 21 lyngba u Yamin Yamal uwei naki rang ïalehkai ba khynnah tam ban thep kol haka lympung Euro Cup bad haka mini tba 25 ka Spain kala ioh ban pynkhih biang ïaka jar lyngba u Dani Olmo kaba la pynjem khnap syndon ïaka France haduh ba kut ka kylla miet.
Lyngba katei ka jingjop ka Spain kala ioh ban bsut sha ka Phainal jong ka lympung Euro Cup hadien ba pynliem ïaka France da 2-1 kol bad pynkhreh pat ban ïakhun haka phainal pyrshah ïaka England lane Netherland kiban sa ïakhun shibit haka por 12:30 mynstep.
