Ka President jong ka ri India, ka Droupadi Murmu mynta ka sngi, ka la pyni paidbah ia ki khusnam trophy jong ka lympung ialehkai phutbol Durand Cup 2024. Kine ki khusnam trophy kiba la pyni paidbah da ka Droupadi Murmu ha kane ka sngi, ki kynthup ia ka Durand Cup, ka President’s Cup bad ka Shimla Trophy.
Haba kren lyngkat ha kane ka sngi, ka Droupadi Murmu ka la ong ba ka kam ialehkai phutbol, kadei kawei na ki jaid jingialehkai kaba pawnam tam ha kylleng ka pyrthei bad haba ki rangialehkai kiba tbit ki mih sha madan ban ialehkai hakhmat ki hajar ngut ki paidbah, ka jingshongshit jong ki rangialehkai bad ki nongpeitkai ruh kumjuh ka nang kiew bun shah.
Ka Droupadi Murmu ka la ai ruh ka jingkitbok kitrwiang sha baroh ki kynhun kiba iashim bynta ha kane ka Durand Cup mynta u snem 2024 kaba yn sdang naduh ka 27 tarik u bnai Naitung haduh ka 31 tarik u bnai Nailar mynta u snem ha ki saw tylli ki jaka jong ka ri, kiba kynthup ia ka nongbah Shillong, Kolkata, Kokrajhar bad Jamshedpur.
Ka kyntu ruh ia ki rangialehkai lada jop ne rem, kadei ban don ka jingburom mar kylliang bad ka jingiakhun da kaba khuid kaba suba katkum ki kyndon ialehkai bad kyntu ruh ia ki paidabh ka ri ba kin mih shakhmat ban kyntiew ia ka kam ialehkai phutbol hapoh ka ri India.
