Shillong, Naitung 10: Na bynta ban ia pyrkhat ban ia tai sani na ka bynta ki nongthep vote ha ki 29 tylli ki MDC Constituency, ka Ingdorbar Jong ka Khasi Hills Autonomous District Council (KHADC ) mynta ka sngi ka la Rai ban phah bishar bnaih ia ka kaiphod jong ka Delimitation committee ha ka Select Committee Jong ka KHADC.
Ia ka kaiphod jong ka Delimitation Committee la wanrah da u deputy CEM ka KHADC, u Bah PN Syiem hapoh ka jingdorbar kaba la sdang mynta ka sngi ha KHADC.
Haba pynshai halor kane ka phang bym pat lah ban pdiang ia kane ka kaiphod, na ka liang u nongialam ka liang pyrshah, u Bah Titosstarwell Chyne, u la kdew ba wat lada ka EC ka la wanrah iakane ka kaiphod sha ka ing dorbar bad na ka liang ki dkhot ka ingdorbar ki hap ban da bishar bniah ia kane ka kaiphod.
U Bah Titos Chyne, u la ong ruh ba ka jingangnud jong ka Delimitation Committee, ka long ban hap ban bishar bniah ia ka jindon ki paid nongthep vote ha ka election MDC bad haba bishar ia ka kaiphod, ka Committee kam lah ban pynpaw, haduh katno ngut don kita ki nongthep vote ha man la ki Constituency.
Ban ioh ia ka jingtip kaba bniah, u Bah Titos Chyne, u la ong ba la donkam ban pynsngew ba dei ban phah shwa ia ka kaiphod sha ka Select Committee bad da kaba pynpaw ruh ba ka jingbym pdiang ia ka kaiphod kam mut ba ka don ka jingpyrshah ia kane ka kaiphod.
U la pynsngew ruh ha ka ing dorbar ba donkam shwa ban phah ia ka kaiphod sha ka Select Committee bad ruh ka jingbym pat pdiang ia ka kaiphod kam shym mut satia ba pyrshah ia katei ka kaiphod.
Kum ka jingpdaing ia ka jingai jingmut ka Liang pyrshah, u deputy CEM u Bah PN Syiem, u la ong ba ka ing dorbar ka la pdaing ban phah ia ka kaiphod jong ka Delimitation Committee shaka Select Committee na ka bynta ban dang shong bishar bniah.
Kum ban pynpaw, Ki dkhot ka Select Committee ki kynthup, Chairman u deputy CEM ba khmih iaka Elaka u Bah PN Syiem, u Nongialam ka Liangpyrshah u Bah Titosstarwell Chyne, u Bah Jambor War, u Bah Bindo Lanong, u Bah Lambor Malngiang, u Bah Balajied Rani bad u Secretary ka EC kum u member secretary.
