U National President ka NPP bad uba dei ruh u Myntri rangbah ka jylla Meghalaya, u Conrad K. Sangma, ha ka sngi Balang jong ka taiew, u la pyntip ba ka NPP National Committee kam pat shym la ai ia kano kano ka rai, halor ka jingai jingmut da ka NPP State Committee, na ka bynta ban pynieng kyrtong ha ka election shiteng samoi na Gambegre Constituency
“Ngi la ioh pdiang ia ka jingai jingmut na ka State Committee ka NPP ban pynieng Kyrtong ha katei ka election shiteng samoi, hynrei ka National Committee kam pat ioh ban ia shong pyrkhat sani. Hadien ba ka National Committee ka NPP kan sa shong pyrkhat sa shisien, kumba la ai rai khatduh da ka state Committee bad ngin ia ap shwa ia kata bad ia mynta ngim pat lah ban ai kano kano ka jubab kaba kyrkieh halor ka jingpynieng kyrtong ha katei ka election shiteng samoi” ong u Conrad K. Sangma.
Shuh shuh, kumba long haduh mynta, u la ong ba ia kane ka kam ban pynieng kyrtong ha katei ka election shiteng samoi na Gambegre Constituency, ka National Committee ka NPP kam pat shyn la lah ban pyntip paidbah bad ka National Committee kan sa shong pyrkhat sani, kynthup ruh ban ai rai halor ki jingtyrwa bad ki jingai jingmut ba la wan rah da ka State Committee, u la bynrap.
