Palat 40 ngut ki samla kynthei na kylleng jong ka jylla, ki la wan ban iashim bynta ha ka ‘Audition’ ne ka jingjied na ka bynta ban iakhun ia ka nam Miss Meghalaya bad Miss Teen Meghalaya 2024 kaba la dep ban pynlong ha ka 6 tarik jong u bnai Naitung ha Hotel Vivanta ka nongbah Shillong.
Ki nongpyniaid jong kane ka lympung, ki la pyntip ruh ba ka nongjop jong ka Miss Meghalaya 2024 kan shah khot ruh kum ka Miss Universe Meghalaya bad kan ioh iaka lad ban leit iashim bynta ha ka Miss Universe India 2024, katba ki ar ngut kiba lah ban ioh ia ka kyrdan ba ar bad ba lai kin ioh ban leit mihkhmat ia ka jylla ha ka Miss Northeast 2024, kaba yn pynlong haka nongbah Itanagar jong ka jylla Arunachal Pradesh. Ki la pyntip ruh ba ka nongjop jong ka Miss Teen Meghalaya 2024 kan ioh ban leit iashim bynta ha ka Miss Teen Diva 2025, kaba yn pynlong ha Jaipur, Rajasthan.
Ki nongpyniaid ki la pyntip ruh ba ka ka Grand Finale jong kane ka lympung iakop thei bhabriew Miss Meghalaya bad Miss Teen Meghalaya 2024 yn pynlong ha LARITI Multipurpose Hall ha ka 3 tarik u Nailar 2024.
