Da ka jingthmu ban kyntiew ia ka ktien ba ngi kren, ka sorkar jylla mynta ka sngi ka la lah ban pyllait paidbah ia la ka jong ka rynsan Over-The-Top (OTT) kaba ailad ia ki nongrwai, ki nongshna phlim bad ruh ki nongshna durkhih na ka jylla ba kin ioh kamai bad im ja, ia kaba la tip kum ka Hello Meghalaya.
Ia kane ka rynsan OTT, Hello Meghalaya kaba ki paidbah ki lah ban download ia ka apps lyngba ka Google Play store la pyllait paidbah mynta ka sngi ha LARITI International Center for Performing Arts and Culture kaba don ha Mawdiangdiang da u Myntri Rangbah ka jylla, u Conrad K Sangma.
Lyngba kane ka rynsan, ki nongshna phlim ki lah ban kamai haduh T. 5 lak kawei ka phlim bad kan don ruh ka jingbei tyngka kaba kham kyrpang ia ki phlim kiba la ioh nam ha ka rynsan National ne International. La iathuh ruh ba ki nongshna durkhih lane kita ki content creators, ki lah ban ioh haduh T. 18 hajar shi bnai na ka bynta ki durkhih ki jongki ha kaba kin lah ruh ban ioh kaba kham heh, katkum ka jingdon jong ki nongpeit ia ki durkhih ki jongki. Shuh shuh, nalor kitei haneng, ki nongshna phlim lyngkot, bad ki nongshna dur khih lyngkot ruh kin ioh jingmyntoi lang lyngba kane ka rynsan.
La iathuh ba ka sorkar jylla ka don ia ka thong ban pynmih ia ki durkhih ha ka por ba kaba pynlong ia ki prokram bapher bapher kaba ki ong ‘live streaming’ ha ka ktien nongwei lyngba katei ka rynsan Hello Meghalaya, nuksa kum ki jingialehkai phutbol, ki tamasa rwai bad kiwei kiwei de da ka jingthmu ban pynioh lad ia ki paidbah ha kylleng ka jylla kin ioh ban sakhi lyngba ki mobile phone ki jongki.
U Myntri Rangbah ka Jylla, u Conrad K Sangma haba kren ha kane ka sngi, u la ong ba kane kadei ka jingbteng ia ka jingpyrshang jongka sorkar ban ithuh bad pynneh pynsah ia ka ktien bad bynrap ruh ba kane kan long da shisha kaban wanrah jingkylla ia ka sap ka phong bad ka rynsan kaba khraw kaba ngim pat ju iohi, na ka bynta ki nongshna phlim bad ki nongrwai ka jylla.
U Conrad K Sangma u la buh ruh ka jingkyntu ia ki paidbah ka jylla ba kin iasnoh kti lang lyngba kane ka rynsan ba kin peit bad pynioh jingmyntoi ia ki sap ki phong ki briew donsap ka jylla. U la pynkynmaw ruh ia ka jingiakren ka jong u bad u Myntri Rangbah ka jylla, u Narendra Modi, uba la pynpaw ia ka jingsngewtynnad ban iohsngew halor kane ka rynsan Hello Meghalaya bad kyrpad ruh ba lada long kaba lah ban pyniar ia kane ka rynsan sha ka National bad International ryngkat na ka jingiatreilang bad kiwei kiwei ‘riew donsap na kylleng ka pyrthei.
Na ka liang u Myntri ka tnad Tourism, u Bah Paul Lyngdoh uba la kren halor ka Meghalaya Grassroots Music Project (MGMP), u la pyntip ba kumba 3000 ngut ki nongrwai ka jylla ki ioh kamai lyngba ka kam rwai. Ka jingiatreilang bad ka Hard Rock Café mynta kan pynioh ia ka rynsan jong ka ki nongrwai ka nongbah Shillong bad ka jylla Meghalaya bad kin ioh ban leit pyni ia ki sap ki phong ki jongki ha kylleng ki jaka jong ka Hard Rock Café kiba don ha ka ri.
Ha kane ka sngi, la pyllait paidbah ruh ia ka durkhih ‘teaser’ jong ka rynsan Hello Meghalaya, kaba pynbud pat da ka jingsam khusnam halor ka Meghalaya Content Creators Award 2024. Ka Meghalaya Content Creators Award 2024, kaba dei ka jingsdang jong ka sorkar jylla la ioh ban sam ia ki nongshna durkhih ha ki 14 tylli ki kyrdan, kiba la ioh da u Jr Storyteller Lyndon, ka Green-Tech Foundation, ka Kong Warimeki Lyngwa, Triyan Babilsi, Grace Marbaniang, Akkim Tito A. Momin, ka kynhun Chiiung, u Dr. Kham Chyrmang, ka Pema Leilani Ward Kyndiah, ka Rachel Anne Nongkhlaw, Saldorik D. Sangma, u Wanjop Sohkhlet, Yoomani Myria, Biria Shillong, Dapalei Stacy Warjri bad u Bah Ferdinand Rani.
