U Myntri jong ka sorkar pdeng ba dei khmih ia tnad Development of North Eastern Region (DoNER), u Jyotiraditya Scindia hynnin ka sngi u la wan ban iuh kjat sha ka nongbah Shillong na ka bynta ban pynlong jingialang bad ki heh sorkar ka jylla.
Ha katei ka jingialang bad utei u Myntri ka sorkar pdeng kaba la pynlong haka hotel Courtyard by Marriot, la wan ban iadon ryngkat ruh da u Myntri Rangbah ka jylla, u Conrad K Sangma nalor kiwei kiwei de ki heh ophisar ka jylla.
Haba kren sha ki lad pathai khubor hadien katei ka jingialang, u Jyotiraditya Scindia u la iathuh ba la ioh ban iatai ia shibun ki mat bad u Myntri Rangbah ka jylla, u Conrad K Sangma, ha kaba iadei bad ka jingthaw ia ki Directorate kaba thymai, ka Shillong Investment Area, nangta de ban thaw lad thaw lynti ban saindur thymmai ia ka nongbah.
Nalor kitei,la iathuh ba kiwei de ki mat kiba la ioh ban iatai ha katei ka jingialang ki kynthup ruh halor ka kam jngohkai pyrthei, kam rep kam riang bad ruh ha iadei bad ki Information Technology na ka bynta ban kyntiew shaphrang ia ka jylla.
