U Babu Bakstar Diengdoh na ka shnong Belahari mynta ka sngi u la lait noh na ka jingshah set along ha ka Central Jail ka Assam, kaba dei hadien 10 sngi kaba u la shah set along hadien ba la shah kem ha ka tnad Forest ka Assam ha ka thain khappud ka shnong Belahari ba hap ha Meghalaya.
Kane ka jinglait noh u Babu Bakstar Diengdoh na ka jingshah set phathok ha Assam, ka dei hadien ba u la ioh jamin na ka ingbishar ka Assam bad na ka liang ki kynhun seng bhalang naduh ka KSU, RBYF, HNYF, HANM, FKJGP jong ka Western Ri Bhoi bad ryngkat ka shnong ka thaw bad kiba haing, ki la pdiang burom ia u da ki syntiew bad jingpynkup burom da ka Jain Ryndia hadien ba u la lait na ka jingshah set phatok ba kum ki kynhun seng ki burom ia une u rangbah, uba khlem da leh bakla bad ba ba la shu kem thurmur da ka tnad Forest
Assam tang na ka daw ka jinglum maw ban pynbha ia ka surok shnong Belahari.
Kum ban pynkynmaw, u Babu Bakstar Diengdoh, u la shah kem ha ka 3 tarik u Naitung, 2024, hadien ba u la shah khot hajir ha ka tnad Forest bad naduh katei ka sngi, u la shah kem bad shah set phatok haduh 10 sngi bad ba mynta ka snig u la lait noh na phatok, kaba dei hadien ka jingioh jamin na ka ingbishar ha Assam.
Ki nongïalam seng bhalang ka Western Ri Bhoi, naduh u President ka KSU, u Bah R. Pator, u President ka FKJGP, u Bah C. Doloi, u President ka HANM, u Bah S. Lyngdoh bad kiwei ki nogialam, ki la pynrem jur ia kane ka jingshah kem u Babu Bakstar Diengdoh, kaba dei tang na ka daw ka jingshim kabu ki bor ba dei peit ka tnad Forest ka Assam, kiba la kem khlem Nongrim tang na ka daw ba u pynbha ia ka surok kaba u la leit lum maw ban pynbha ia ka surok ha katei ka shnong khappud.
Ki la ong ruh kine ki kam shah thombor ki nongshong shnong ka jylla Meghalaya ha khappud Meghalaya kam dei shu ka sien kaba nyngkong bad na ka por sha ka por ki ju mad jingeh, kaba dei na ka jingpynibor ka tnad Forest bad ki Pulit ka Assam, ki la kynnoh. Ha kajuh ka por ruh ki la pynpaw ba ka jingshah kem u Babu Bakstar Diengdoh, ka dei ruh kaba khlem Nongrim bad la shu kem jubor da ka tnad Forest Assam, kaba shim kabu tang na ka daw ka jingkhein sting ka sorkar Meghalaya.
Shuh shuh, na ka liang kine ki nongialam, ki la pynrem jur ia kine kam thombor ka sorkar Assam ia ki nongshong shnong ka Meghalaya ha khappud bad ki la dawa ruh na ka sorkar Meghalaya ba ka dei ban shim khia ban ia kren bad ka sorkar Assam bad kum kine k kam thombor kum ki nongialam seng kim kwah shuh ba kan dang jia nangne shakhamt, namar kane ka jingpyni bor ka Assam ka ktah shisha ia ka shongsuk shongsain ki paidbah ha kitei ki shnong khappud.
