U Jyotiraditya Scindia, Myntri ka sorkar pdeng ba dei khmih iaka Development of North Eastern Region (DoNER) ha ka sngi Thohdieng u la ong ba ka sorkar pdeng kan sa phah ia baroh ki jylla ka thain shatei lam mihngi ba kidei ban leh ia ka ‘Social Audit’ lane ka jingkhmih bniah ia ki jingkhein jingdiah halor ki projek kiba la pyntrei ha ki jylla ki jongki lyngba ka jingbei tyngka ka DoNER.
Utei u Myntri u la ong ruh ba katei ka tnad treikam jong u, ym tang ba kan peit tang ia ki syrnod ba pyntrei ne pyndep (utilization certificate & completion certificate) jong ki projek, hynrei kan pynthikna ruh ba baroh phra tylli ki jylla jong ka thain shatei lam mihngi ki leh ia katei ka ‘Social Audit’.
U la ong ruh ba ka long kaba kongsan ban peit ruh ia kaei kaba mih na kitei ki projek ym tang ka jingpynlut da kaba ong ba kam da donkam ban peit mano ba bei tyngka lane ban shu peit tang ia ka jingpyllut, hynrei ban khmih bniah ruh ia ka jingmih na ka jingpyntreikam ia kitei ki skhim.
Shuh shuh, u la ong ruh ba ka jingthmu ka long ban poi sha ka thong ba kut jong ka roi ka par bad ka jingkiew kumba la pynskhem da u Myntri Rangbah ka ri ha ka jingpyrshang jong u ban pynthikna ba ka thain shatei lam mihngi kan long kaba kiew bad kaba lah shai. U Jyotiraditya Scindia u la ong ba ka jingpyrshang jong u, ka long ban wanrah ia ka saindur kaba thymmai ha ka jingiatreilang bad baroh ki jylla ka thain shatei lam mihngi.
