Ki lai tylli ki skul kiba la mihkhmat ia ka Ri Bhoi sha ka State Level Subroto Cup ha nongbah Shillong, ki la ïoh ban khur ia ka namjop ha ka phainal kaba la long mynta ka sngi ha madan SSA Stadium Shillong bad mynta kitei ki skul kin sa ïoh ia ka lad ban mihkhmat pat ia ka jylla Meghalaya ha ka Subroto Cup ka ban sa long ha Nongbah Delhi.
Kitei ki skul na Ri Bhoi bad kiba la ïoh ia ka lad ban mihkhmat ia ka jylla sha Nongbah Delhi, ki kynthup ia ka Mynken Christian Higher Secondary, ka ban sa mihkhmat ha ka U-17 ki shynrang, nangta ka Nongjri Presbyterian Secondary School ha ka U-15 lem bad ka Christan Higher Secondary School, kan sa mihkhmat ha ka U-17 ki kynthei.
Haba phai ha ka jingiakhun ha ka kyrdan U-15 kaba la long hapdeng ka Nongjri Presbyterian Secondary School pyrshah ia ka Government Boys’ Higher Secondary School Tura, ha kaba ka Nongjri Presbyterian Secondary School ka la lah ban pynliem noh ia ka Government Boys’ Higher Secondary School (West Garo Hills) da 4-1.
Katba ha ka jingiakhun ha ka U-17 ki kynthei, kaba la long hapdeng ka Christan Higher Secondary School pyrshah ia ka Kynshai Government LP&UP School (West Khasi Hills), ha kaba ka Christan Higher Secondary School, ka la lah ban pynliem noh da ia ka Kynshai Government LP&UP School da 4-0.
Haba phai pat ha ka jingiakhun ha ka kyrdan U-17 ha ki shynrang, kaba la long hapdeng ka Mynken Christian Higher Secondary School, Bhoirymbong pyrshah ia ka North Liberty Higher Secondary School, West Jaintia Hills, ha ka jingiakhun ka Mynken Christian Higher Secondary School ka la lah ban pynliem noh ia ka North Liberty Higher Secondary School da 3-1.
Lyngba kitei ka namjop ha ka State Level Subroto Cup, kitei ki lai tylli ki skul na Ri Bhoi, kin sa ïoh ia ka lad ban mihkhmat na ka jylla sha ka Subroto Cup ha nongbah Delhi bad ki ban sa iakhun ia kiwei pat ki skul, kiba la mihkhmat na ki jylla bapher bapher ha ka ri.
