Palat 70 ngut ki paidbah ki la khlad ha ka jingther bom jong ki shipai ka ri Israel mynta ka sngi ha Al-Mawasi Camp jong ka thain Khan Younis ha Gaza. Katei ka jingther bom ki shipai Israel kadei hadien ka jingioh jingtip kaba thikna halor ka jingdon jong u Mohammad Deif, nongialam ka Qassam Brigades, ka shnat shipai jong ka seng lehnoh Hamas bad ia u Rafe Salama, nongialam ka Khan Younis Brigade, kiba la rieh tngen ha katei ka jaka.
Katkum ka tyllong khubor CNN, la iathuh ba na ka liang jong ki shipai Israel ki dang ialeh ban pynthikna la utei u Mohammad Deif, uba dei u nongsaindur bad thaw buit ban hiar thma ia ka ri Israel ha ka 7 tarik jong u bnai Risaw ha u snem 2023, u la iap ne em ryngkat bad utei u nongialam ka Khan Younis Brigade.
La iathuh ba katei ka Al-Mawasi Camp kaba la ther bom da ki shipai Israel mynta ka sngi, kadei kaba pynlong kum ka jaka sah shipor jong ki paidbah Gaza kiba la phetwir na kadaw jong ka thma Hamas-Israel kaba neh mynta la kumba phra bnai tam.
Kum ban shu pyntip, u Mohammad Deif la kha ha u snem 1960 bad udei uwei na ki nongshna bom uba la donkti ha kiba bun tylli ki kam hiar thma ia ka ri Israel lyngba ki lehnoh kiba leit ban pyniap ialade da ki bom, bad tang ha u snem 1996, kumba 65 ngut ki paidbah ha Jerusalem bad Tel Aviv ki la duh ia la ka jingim.
La iathuh ruh ba utei u Mohammad Deif udei ruh uba donkti ban saindur bad thaw buit ryngkat bad u Yahya Sinwar, nongialam ka Hamas ha Gaza, ban hiar thma ia ka ri Israel ha ka 7 tarik jong u bnai Risaw mynshem ha kaba 1139 ngut ki nong Israel ki la duh iala jingim ba kynthup ia 695 ngut ki riew paidbah, 38 ngut ki khynnah rit bad 71 ngut kiba dei na kiwei ki ri ka pyrthei. Ha katei ka jingshah hiar thma, ki lehnoh Hamas ki la rahbor ia kumba 250 ngut ki nong Israel ba kynthup ia 30 ngut ki khynnah rit shapoh Gaza.
Kumba long haduh mynta, kumba 116 ngut ki nong Israel kiba la shah rahbor, ki la ioh biang ban wanphai sha ki ing ki sem ki jongki, kata kumba 105 ngut ha ka jingiakylliang koidi bad ki lehnoh Hamas, 7 ngut kiba la pyllait im da ki shipai Israel bad kumba 4 ngut kiba la pyllait hi da ka seng lehnoh Hamas. La iathuh ruh ba ki shipai Israel ki la ioh ban wan pynphai ing ia kumba 19 tylli ki metiap kiba la shah rahbor bad sa kumba 120 ngut ki dang don ha kti jong kitei ki lehnoh Gaza.
